Únete á nosa canle de Whatsapp
O cemiterio municipal de San Froilán, en Lugo, foi incluído por National Geographic na lista de camposantos máis bonitos do mundo. A distinción provocou “satisfacción” entre o goberno local, porque “servirá para reforzar o número de visitantes”.
National Geographic gaba ao camposanto lucense “pola beleza das súas antigas construcións funerarias”, entre as que destaca o ” mausoleo neogótico do século XIX deseñado polo arquitecto lucense Cobreros“, que está situado na entrada do cemiterio.
Ademais, lembrou, tamén fai referencia “á mestura de estilos” desta necrópole, que foi recoñecida “en 2015 como o cemiterio co mellor monumento funerario de España e este ano como o “camposanto con mellores actividades de portas abertas”.O de Lugo comparte lista con cemiterios de Madrid, Asturias, A Coruña, Cantabria, Praga, París ou Edimburgo.
En declaracións aos medios de comunicación, a concelleira de Cidadanía, Rosana Rielo, destacou a importancia de que National Geographic recomende a visita ao cemiterio de Lugo, porque se trata dunha “das organizacións internacionais máis grandes, a nivel mundial, sobre educación e ciencia“, ademais de editar “contidos sobre xeografía, ciencia, historia, cultura, eventos actuais e fotografía”.
