Unha das imaxes inéditas de Saturno publicadas pola NASA. Foto: JPL-
Unha das imaxes inéditas de Saturno publicadas pola NASA. Foto: JPL-

A NASA publica imaxes inéditas dos aneis de Saturno

A axencia estadounidense difunde novas fotografías das últimas observacións da sonda Cassini antes de desintegrarse contra o planeta

En setembro de 2017, a sonda Cassini terminou o seu servizo e desintegrouse contra Saturno, o planeta que estivo estudando durante anos. Porén, os datos recollidos na súa misión seguen chegando pouco a pouco, ao seren procesados polos investigadores da NASA. Desta vez, un novo artigo publicado en Science a semana pasada publica fotografías inéditas dos aneis e describe os resultados obtidos da aproximación á súa superficie.

Así, entre os achados inclúense detalles e texturas dos aneis: cambios de cor, temperatura e composición química que xeran novas cuestións acerca da orixe e situación actual dunha das formacións máis abraiantes do sistema solar.

Entre outros detalles, estas imaxes inéditas amosan as lúas diminutas incrustadas nestes aneis, interactuando coas partículas que as rodean. Do mesmo xeito, as observacións afondan en detalles como o borde exterior dos aneis principais, onde existen raias semellantes xeradas por un impacto no anel F, o que suxire que probablemente foron causadas por unha mesma vaga de impactos nun curto lapso de tempo.

Misterios sen resolver

Do mesmo xeito, outras cuestións previas perduran sobre Saturno. Estas fotografías inéditas dos aneis, cun detalle nunca visto, amosan diferentes texturas que non se corresponden coas características que os científicos identificaran. “Isto cóntanos que o aspecto dos aneis non ten que ver só coa cantidade de material que hai, ten que haber algo distinto nas características das partículas, quizais ten que ver co que acontece cando dúas partículas destes cincos colisionan e rebotan. Pero todavía non sabemos o que é”, dixo o astrónomo Matt Tiscareno.

A pesar dos misterios que permanecen, estes novos datos, e outros que quedan por estudar, ofrecerán aos científicos unha visión aínda máis próxima do planeta. “É como aumentar un pouco máis as nosas posibilidades do que poderiamos ver nos aneis. Todos imos tendo unha visión máis clara do que está pasando”, subliña Linda Spiker, do Jet Propulsion Laboratory da NASA.

Referencias: Close-range remote sensing of Saturn’s rings during Cassini’s ring-grazing orbits and Grand Finale (Publicado en Science).

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.