Un incendio activo dende a tarde deste luns deixa máis de 100 hectáreas queimadas no concello de Muíños, en Ourense, en pleno Parque Natural Baixa Limia-Serra do Xurés. Segundo confirma a Consellería de Medio Rural, o lume afecta principalmente á parroquia de Prado de Limia e chegou a Galicia procedente de Portugal. Alí iniciáronse dous focos diferentes e un deles propiciou que o incendio tamén chegase ao outro lado da fronteira. Ao parecer, orixinouse sobre as 18.00 horas e na tarde deste luns traballaban na zona dous axentes, dúas brigadas e tres motobombas.
É o terceiro incendio dos últimos días que volve afectar á zona, que tamén calcinaron outras áreas en Muíños e en Calvos de Randín. O vento está dificultando o traballo dos medios terrestres e a zona queimada xa se pode ver dende as imaxes de satélite que ofrece o Sistema Europeo de Información sobre Incendios Forestais (EFFIS), de Copernicus. Ademais da área afectada en Galicia, pódense ver máis dunha ducia de zonas portuguesas calcinadas segundo o sensor VIIRS, que se actualiza diariamente. Todos os lumes comezaron entre os días 3 e 5 de febreiro. De feito, un dos incendios que asolou esta zona de Portugal foi o que cruzou a fronteira con Galicia, afectando tamén ao parque natural.
