A abrumadora vaga de incendios que está arrasando Australia durante esta primavera austral está deixando pegada a gran escala nesta rexión do planeta. E a pesar da distancia da illa a calquera outro punto de terra firme, os efectos das cinzas que espalla o vento déixanse sentir a máis de 2.000 quilómetros de distancia, nos Alpes do Sur de Nova Zelandia. Alí, os glaciares destas montañas, que superan os 3.000 metros de altitude, recibiron nas últimas semanas nubes de cinzas e po que tinguiron a neve.
Así o amosan unhas imaxes da fotógrafa Liz Carlson, que sobrevoou a zona e reparou na cor avermellada dos glaciares e outros puntos da cordilleira nos que se acumulou a neve. Segundo informou recentemente o Earth Observatory da NASA, grandes nubes de fume cruzaron o Pacífico, despois de cubrir tamén a área metropolitana de Sydney, e foron espallándose polo hemisferio sur, golpeando de cheo a Nova Zelandia. Así o amosa unha animación elaborada pola NASA a partir dos datos do satélite Aqua.
“Smoke plumes from the Australian fires have risen as high as 12 to 13 kilometres (7 to 8 miles) in the atmosphere. That is unusually high for wildfires”
NASA visualisation that shows black carbon from Australia’s wildfires crossing the Pacific: https://t.co/FRHFrbHm6v pic.twitter.com/GYA0LkMnDB
— Ketan Joshi (@KetanJ0) November 22, 2019
Segundo a información facilitada pola axencia estadounidense, as columnas de fume chegaron a ascender ata 13 quilómetros de altura, un nivel moi pouco habitual para os incendios forestais.
Porén, a cor vermella atopada nos glaciares pode deberse tamén en parte ás tormentas de po que afectaron nas últimas semanas na rexión suroeste de Victoria. O solo de gran parte da illa, moi rico en ferro, dálle este aspecto avermellado á súa superficie cando se observa desde o satélite.
Estas nubes de cinza que xeran as grandes vagas de incendios tamén se percibiron en Galicia en outubro de 2017. Son notablemente daniñas para a saúde porque moitas delas, debido ao seu pequeno tamaño, poden entrar nos pulmóns e o torrente sanguíneo.
No caso da natureza, estas grandes masas de po e cinzas poden oscurecer a neve e o xeo, acelerando o derretemento de formacións como os glaciares.
