Ibai, Luceira e Lula son tres tartarugas que acaban de ser devoltas ao mar pola Coordinadora para o Estudo de Mamíferos Mariños (Cemma). Estes reptís estaban recuperándose despois de varar nas costas galegas e, segundo o protocolo da organización, recóllense todas as tartarugas que aparecen en Galicia nestas datas porque a temperatura está moi fría para elas e necesitan coidados. Despois dun tempo no centro de recuperación e tras botar todos os plásticos do tracto dixestivo, poden volver ao seu hábitat natural.
As tartarugas apareceran na ría de Cedeira e na do Barqueiro en Fisterra atrapadas en redes de pesca e foron rescatadas polos propios mariñeiros. Despois, a Cemma trasladounas ao centro de recuperación para asegurarse de que botaban todos os plásticos que portaban nos seus estómagos.
“Temos rexistros desta especie en Galicia. Elas nacen no Caribe, en Cabo Verde. As que aparecen aquí veñen da Corrente de Golfo. En inverno viaxan cara ao norte e os temporais desprázanas cara a costa”, explican dende a Cemma. As temperaturas baixas aféctanlle ao seu metabolismo e poden entrar nun estado de “letargo” e incluso morrer.
Con todo, na actualidade as temperaturas do Atlántico Norte están máis altas do normal, por iso, Ibai, Luceira e Lula xa puideron volver ao océano. Normalmente, botan o tempo que “faga falta” no centro de recuperación e volven ao mar en verán, cando as augas están máis cálidas. “Cando chegaron estaban ben, o que quere dicir que a temperatura non lles estaba afectando. Xa tiñan un peso corporal axeitado e agora, as condicións eran boas para que volvesen ao mar”.
