A espera e a incerteza pagou a pena. A recuperación da Marumasat 3, a sonda da Axencia Espacial Escolar Galega, a NOSA, que foi atopada o sábado en Negreira, permitiu acceder aos datos recabados pola cápsula na estratosfera. Desde este luns, o equipo da NOSA, do que forman parte estudantes e profesores de catro institutos galegos, está a analizar os datos recollidos. Pero xa é posible ver algunhas das espectaculares imaxes que a sonda captou desde a estratosfera 30 quilómetros de altura.
Estas instantáneas amosan o perfil da costa de Galicia e o norte de Portugal. É sinxelo albiscar desde A Guarda ata Camariñas, as penínsulas do Morrazo, o Salnés e o Barbanza, e as rías de Vigo, Pontevedra, Arousa e Muros e Noia, así como as linguas de area de praias como a de Carnota ou a do Vilar, coas dunas de Corrubedo ao seu carón.
Ademais destas imaxes, desde a conta de Twitter da NOSA compartiron tamén un fragmento do vídeo do voo:
Aí van!!! Sen editar… as primeiras imaxes da viaxe da #marumasat3. E nuns días o video completo na nosa canle de youtube.#nosa #axenciaespacialescolargalega pic.twitter.com/xt0pNEYkmD
— Axencia NOSA (@MarumaSAT) 14 de mayo de 2018
Naceron tres dos ovos de abella
Pero alén destas espectaculares imaxes, a Marumasat tamén recolleu datos moi relevantes para a investigación científica da NOSA. “Nas próximas datas traballaremos sobre os niveis de ozono e radiación ultravioleta presentes na estratosfera”, e tirarán conclusións “sobre as condicións de habitabilidade da cápsula, en termos de temperatura e humidade”, explica o equipo docente da NOSA.
Neste senso, xa se puido constatar que naceron na estratosfera tres exemplares de abella obreira dos ovos que ían dentro da cápsula. E por outra banda, tamén se estudarán unhas fabas que ían a bordo, e que se someteron á radiación ultravioleta. Compararanse con outras fabas de control, da mesma procedencia, para estudar a incidencia da radiación no seu crecemento.
En canto aos experimentos físicos, estudaranse as magnitudes atmosféricas básicas (presión, temperatura, humidade, altitude, dirección e intensidade do vento) e compararase a traxectoria real de voo coa que estaba prevista segundo os modelos CUSF Landing e Astra Balloon Flight Planner. A Marumasat 3 tamén levaba a bordo unha placa solar en probas, que do mesmo xeito será estudada.
Muitos parabéns aos rapaces e ao País galego por este grande paso
Parabéns ós rapaces e mestres participantes no proxecto, ogallá houbese máis mestres que ensinasen as ciencias así, que sorte teñen estes rapaces.