Nun dos lugares máis inhóspitos do mundo, a Foxa das Marianas, que acada profundidades de máis de 10km entre o Xapón e as illas Filipinas, un grupo de científicos da universidade de Newcastle vén de realizar un achado que volve poñer de relevo a contaminación por microplásticos no planeta. Alí atoparon unha nova especie do xénero Eurythenes, nunca antes descrita, e que bautizaron como Eurythenes plasticus por unha circunstancia bastante peculiar: atoparon no seu interior unha fibra de plástico PET, composto moi habitual en botellas e outros envases.
We describe a new species of deep-sea amphipod and already we are finding plastic in their stomach. We welcome Eurythenes plasticus to the world. #plasticpollution https://t.co/I6BIokjqR4 @ecology_ncl @newcastlemarine @UniofNewcastle @WWF @AllLittleFishes pic.twitter.com/xn0Ni5H1eZ
— William Reid (@dr_will_reid) March 5, 2020
Os científicos explican o achado nun artigo publicado na revista Zootaxa. Realizouse en 2014, nunha exploración feita entre 6.000 e 7.000 metros de profundidade. Entre as especies localizadas, viuse que esta tiña unha morfoloxía distinta as descritas anteriormente dentro do xénero Eurythenes. A campaña, realizada en colaboración coa entidade ecoloxista WWF, quería tamén poñer de manifesto os problemas de xestión dos residuos de plástico no sueste de Asia e a conseguinte contaminación que estas eivas causan.
Calcúlase, segundo expón a Universidade de Newcastle, que cada minuto se bota aos océanos do planeta unha cantidade comparable a un camión cheo de plástico.
Baixa 11.000 metros nas Marianas e atopa unha bolsa de plástico
Referencia: New species of Eurythenes from hadal depths of the Mariana Trench, Pacific Ocean (Crustacea: Amphipoda) (Publicado en Zootaxa).
