Únete á nosa canle de Whatsapp
A contaminación por plásticos de orixe antrópica que afecta á Terra é, segundo os expertos, un dos principais problemas medioambientais ao que nos teremos que enfrontar no século XXI. Non deixamos de recibir noticias sobre a presenza deste material no interior de animais mariños mortos ou do gran volume de residuos que se acumulan nalgunhas zonas do planeta. A fabricación de envases e empaquetado a partir destes materiais supuxo un importante avance en moitos aspectos da nosa vida diaria. Mais o seu uso excesivo está sendo, noutros moitos casos, un síntoma de que algo se está a facer mal.
Neste senso xurdiu, a través das redes sociais, a campaña #DesnudalaFruta, que denuncia o excesivo empaquetado de produtos alimenticios como froitas, verduras ou hortalizas que se pode ver nalgunhas grandes cadeas de supermercados. A través tamén doutras etiquetas, como #BreakFreefromPlastics ou #RidiculousPlastic, organizacións ecoloxistas como Greenpeace, apoiadas por milleiros de usuarios das redes, promoven a publicación de fotografías que poñan de manifesto estas prácticas.
El sobreempaquetado de la fruta en los supermercados se nos ha ido de las manos. Solo hay que verlo mirando estas imágenes de frutas plastificadas de tuiteros. Abro #hilo pic.twitter.com/1PtR5HA0XQ
— AlexFernándezMuerza (@ecienciacom) 12 de abril de 2018
Hai imaxes de todo tipo: un aguacate cortado e pelado nun envase de cartón e plástico, ovos xa cocidos envasados de xeito individual, fresas recubertas con cadansúa caparucha de plástico, cogombros, cebolas ou patacas plastificadas individualmente, etc.
Estas prácticas coliden frontalmente coa Estratexia Europea sobre Plásticos aprobada en xaneiro deste ano, que avoga por reducir o empaquetado con este material que non se biodegrada no medio ambiente, e que xera cada ano en Europa, segundo datos da propia UE, 25 millóns de toneladas de residuos.
Ademais, en moitos casos, o consumidor prefire o produto empaquetado ao que está a granel, pagar un prezo maior a cambio da comodidade de ter xa pelado e cortado o produto. E en outras ocasións, estes produtos veñen coa suposta etiqueta de ‘bio’, o que supón un paradoxo, dado o prexuízo para o medio ambiente que supón o excesivo empaquetado.
