A científica Angélica Figueroa Conde-Valvis, responsable do grupo de Plasticidade Epitelial e Metástase do Instituto de Investigación Biomédica da Coruña (INIBIC), impartirá este xoves unha conferencia na Coruña no marco do ciclo Ciencia exPress. A intervención levará por título “Cancro e metástase: un gran reto en investigación”.
Angélica Figueroa é licenciada en Bioloxía pola Universidad Complutense de Madrid e Doutora en Bioquímica e Bioloxía Molecular pola Universidad Autónoma de Madrid. Durante preto de seis anos levou a cabo a súa actividade investigadora en institutos de investigación internacionais de prestixio, como o Institute of Molecular Bioscience, na Queensland University, (Australia, 2001) e no National Institute on Aging-National Institute of Health (NIA-NIH, USA, 2002) e no Laboratory for Molecular Cell Biology – Medical Research Council – University College London (LMCB, MRC, UCL, London, UK. 2003-2008)).
É experta no estudo do proceso de invasión e metástase de carcinomas. É membro da Xunta Directiva de la ASEICA (Asociación Española de Investigación sobre o Cancro), membro da EACR (European Association for Cancer Research) e conta cun Mestrado en Xestión Sanitaria e Hospitalaria (IFFE Business School). Publicou numerosos artigos de impacto no campo da oncoloxía e foi galardoada co “XIX Premio Rafael Hervada” en recoñecemento ao labor científico desenvolvido en Investigación Biomédica do Cancro.
A conferencia está aberta a todo o público, e comezará ás 20 horas na Sala de Prensa da Reitoría da Universidade da Coruña, na Maestranza.
‘Ciencia exPress’ é un ciclo organizado pola Unidade de Divulgación Científica e Cultural da Universidade da Coruña, en colaboración coa Asociación de la Prensa da Coruña e a Deputación da Coruña, e ten como finalidade explicar temas de actualidade científica de forma rigorosa e amena por expertos da UDC.
