O sol estaba a piques de desaparecer no horizonte. Pero antes da súa marcha, a fotógrada afeccionada Sandra Sánchez logrou capturar o famoso raio verde ás 19:39 horas dende o porto da Guarda. Foi o luns 16 de marzo cando conseguiu retratar en vídeo un fenómeno que adoita producirse xusto despois da saída do sol ou antes do solpor. O raio verde débese a que, en determinadas condicións, a atmosfera produce un fenómeno de dispersión e difracción das ondas de luz. Isto anula algunhas cores do espectro visible para os humanos mentres que maximiza as ondas arredor dos 525nm, que se corresponden con tons verdosos.
Non é doado ver nin retratar o raio verde. Non só é famoso polo fermoso espectáculo que ofrece a quen o observa, senón tamén grazas ás referencias culturais. O escritor Julio Verne dedicoulle un libro á súa busca e o filme Piratas do Caribe mencionábao como unha lenda.
Aquí pódese ver unha secuencia en vídeo capturada por Sandra Sánchez, que logra retratar o fenómeno xusto no momento en que o sol desaparece:
