O Bottlenose Dolphin Research Institute (BDRI), con base no Grove, captou esta semana a imaxe dunha balea azul, o animal máis grande do mundo. A Balaenoptera musculus, pode alcanzar os 30 metros de lonxitude (tamaño semellante á altura do acueduto de Segovia) e un peso de máis de 170 toneladas; o seu corazón pode pesar tanto coma un turismo, e a súa lingua, coma un elefante.
Desta volta, os investigadores do BDRI captaron á balea azul xunto a tres rorcuais comúns e un rorcual alibranco, que estiveron a alimentarse a poucas millas entre a illa de Sálvora e Aguiño.
Dende o BDRI explican que a dispoñibilidade e concentración do seu alimento principal, o krill do norte (Meganyctiphanes norvegica), determina a distribución e o comportamento das baleas. “A balea azul, por exemplo, aliméntase case exclusivamente de krill e inxere ao redor de 1 tonelada ao día”, afirman, para salientar que a súa alimentación en superficie “require un esforzo físico considerable xa que a balea azul chea a súa boca cun volume de auga igual ao seu propio peso de 80-90 toneladas”.
Curiosamente, o círculo biolóxico péchase, porque como sinalan os investigadores do BDRI, “ao mesmo tempo, a presenza das baleas contribúe a fertilizar a superficie do océano co seu defecaciones que facilitan o crecemento de fitoplancto que serve de alimento para o krill”.
