Desde comezos de xullo, se miramos ao ceo é posible ver algo que ninguén que hoxe estea vivo volverá ver de novo. O cometa Neowise (C/2020 F3), cun período orbital de arredor de 6.500 anos, é visible ao mirar cara ao norte. Se é posible, cómpre facelo nunha zona con pouca contaminación luminosa e co horizonte despexado. Así o fixo Álex (@aleixandrus) un astrofotógrafo galego que captou o cometa o pasado domingo desde o Pico Sacro, en Boqueixón, pasadas ás 23.35 horas.
Aínda que case era noite pecha, a exposición da cámara para mellorar a observación do cometa amosa os últimos raios do sol no horizonte, tras a cidade de Santiago. “Hai que mirar orientación N-NO a uns 10º de altura; para ter unha idea, se estiras o brazo e pechas o puño da man, a altura da man apoiándoa sobre o horizonte dá máis ou menos esa altura”, explica Álex.
Nos vindeiros días, Neowise irá gañando altura no ceo do anoitecer, mentres que deixará de ser visible ao amencer porque coincidirá coa saída do Sol. Con todo, é recomendable observalo cando antes porque irá perdendo brillo. Para velo, ademais dunhas boas condicións no ceo, recoméndase miralo con prismáticos.
Si quieres ver el cometa C/2020 F3 NEOWISE, te recomendamos que lo busques hacia el noroeste 1 hora después de que se ponga el Sol. Para saber a qué hora se pone el Sol en tu provincia, mira este enlace: https://t.co/IcBRN08D6i pic.twitter.com/hPgUkeg9BI
— Real Observatorio (@RObsMadrid) July 14, 2020
O cometa Neowise acadou o seu perihelio (distancia mínima ao Sol) o pasado 3 de xullo, situándose a 0,3 unidades astronómicas da estrela, e cunha magnitude 0,5. Nestes días, a magnitude xa é menor. O 23 de xullo acadará a súa máxima proximidade á Terra, aínda que xa lonxe do Sol, polo que a súa magnitude baixará a 3,5.
Un período orbital de 6.500 anos
Tal e como explicou o científico Josep M. Trigo na revista Investigación y Ciencia, o cometa Neowise segue unha óbrita case parabólica, cun período orbital que aínda se está precisando, pero que se estima en arredor de 6.500 anos. “Non é habitual que existan observacións previas destes cometas de períodos tan longos, a non ser as meticulosamente tomadas hai máis de mil anos por astrónomos chineses para cometas de períodos bastante máis curtos”.
