O pazo de San Roque, en Compostela, acolleu o acto de entrega da sexta edición do Premio Contar a Ciencia La Caixa, convocado pola Real Academia Galega de Ciencias, patrocinado pola Fundación La Caixa, organizado por GCiencia, e coa colaboración da Secretaría Xeral de Universidades e a tecnolóxica galega Primux.
A estudante de Xornalismo da USC Marta Otero Mayán foi a gañadora do certame grazas á reportaxe Unha app para coidar a quen coida, un traballo no que conta desde un enfoque persoal un proxecto do Grupo de Investigación en Saúde Mental e Psicopatoloxía da USC para previr a depresión en coidadores de persoas dependentes.
Andrea Varela e Miriam Álvarez, estudantes de Comunicación Audiovisual da UVigo, desenvolveron un dos traballos finalistas, Scuba Cancers: así é a loita contra o cancro transmisible en bivalvos. A outra finalista foi Alba Tomé Sueiro, graduada en Xornalismo pola USC, coa súa reportaxe Como gañar o que che quita o Parkinson.
