Centos de medusas vararon esta fin de semana na praia de Nerga, en Cangas do Morrazo. Unha veciña que paseaba polo areal o domingo pola mañá deu a voz de alarma ao avistar “uns 200 exemplares” espallados ao longo e ancho da praia. Aínda se descoñecen tanto a especie como as causas do varamento masivo, pero hai algunhas hipóteses que poderían explicar o fenómeno. O director da Estación Biolóxica da Graña, Guillermo Díaz, baralla a posibilidade de que as correntes e o vento levasen as medusas a varar na praia, aínda que para corroborar esta teoría habería que analizar en que estado chegaron os exemplares ao areal.
“Os varamentos masivos coma este non son raros en Galicia. Nas costas de Ferrolterra, por exemplo, chegan moitas carabelas portuguesas ao final do verán”, sinala o experto. Con todo, a chegada de medusas a Nerga non é o único acontecemento destas características que ocorreu en Galicia nas últimas semanas. Tamén vararon recentemente exemplares de Pelagia noctiluca nos areais de Carnota e Area Maior; un fenómeno que se puido deber ao temporal costeiro que azoutou hai unha semana o litoral galego. Con todo, Díaz asegura que hai outros motivos polos que as medusas chegan á costa, como o quecemento das augas e a diminución dos depredadores.
