Unha quenlla (Prionace glauca) de 1,5 metros de lonxitude sorprendeu este mércores aos veciños da Illa de Arousa mentres paseaban polo porto. Un exemplar xuvenil achegouse á liña de costa, algo pouco habitual nesta especie propia de augas máis frías e oceánicas. Porén, esta quenlla avistouse nadando en augas superficiais e cunha ferida nun costado, que puido ser causada por un arpón. Por iso, barállase a hipótese de que aparecese dentro da ría na busca de augas máis tranquilas.
Segundo detectan dende a Coordinadora para o Estudo de Mamíferos Mariños (Cemma), nos últimos anos estase a incrementar a chegada de quenllas ás liñas de costa galegas. Isto é un fenómeno novidoso, dado que é habitual ver tiburóns en Galicia, pero non tan preto das praias. O maior pico de chegadas prodúcese entre xullo e agosto en exemplares máis pequenos, que acaban de nacer, e poden medir entre 50 e 70 centímetros. Moitos deles chegan á costa para buscar alimento.
O mariñeiro e divulgador Rogelio Santos Queiruga dicía a través da súa canle de Twitter que a quenlla que apareceu na Illa “corre máis perigo ca nós”, pedindo así que non se incomode ao exemplar. “Que se vexan próximos á costa é unha boa noticia. É sinal de que en alta mar, o sitio no que adoitan vivir, se pode estar recuperando despois de décadas de sobrepesca. Pode que no futuro volvan ser unha fonte de alimento, emprego e cartos para o maltreito sector pesqueiro”, di o divulgador, que pide tratalos ben e velos dende a costa, con “prudencia e respecto”.