Moitos din que foi a derradeira eclipse da década, pero a década non vai rematar ata o 31 de decembro de 2020. E quedan varios fenómenos similares ata chegar alí. Pero si foi todo un espectáculo para os afortunados que puideron gozar este 26 de decembro da eclipse anular de Sol, visible en Qatar, Omán, a India e Singapura.
Who saw this?#RingofFire pic.twitter.com/mGgCoxx552
— SAyed Mustafa Kamal (@SAyedMustafaKa4) December 26, 2019
As eclipses anulares acontecen cando a Lúa non está dabondo preto da Terra como para escurecer completamente o sol, deixando visible un delgado anel do disco solar. Aínda que estes tipos de eclipses acontecen cada ano ou dous, só son visibles desde unha banda estreita da Terra cada vez e poden pasar décadas antes de que se repita o mesmo patrón.
Dependendo das condicións climáticas, o fenómeno astronómico deste ano fíxose visible desde o Medio Oriente a través do sur da India e de Asia antes de rematar no Pacífico norte.
A vindeira eclipse será en xuño de 2020 e será visible para unha banda estreita desde África ata o norte de Asia. O seguinte, en xuño de 2021, só vai poder verse no Ártico e partes de Canadá, Groenlandia e as zonas orientais de Rusia.
A razón pola que vemos este ‘anel de lume’ débese á distancia do pequeno satélite do noso planeta. A Lúa está actualmente máis preto do seu apoxeo (o que significa que está máis lonxe da Terra), o que fai que pareza un 3 por cento máis pequena que o Sol cando se ve desde a Terra. Podes ver como se ve unha eclipse anular nesta espectacular foto satelital capturada pola NASA en xaneiro de 2011.
