Moitos ollos na península ibérica están postos na borrasca Filomena. No seu tránsito desde as Illas Canarias, onde xa causou problemas, o temporal móvese en dirección nordeste cara territorio peninsular, deixando un mapa de avisos e alertas que chegan ao nivel vermello nas mesetas e no suroeste de España. Máis de 20 centímetros de neve en menos de 24 horas, mínimas por baixo dos -20ºC… De cumprirse a previsión, o centro da península estaría ante un dos meirandes temporais dos últimos anos. Galicia non se verá afectada directamente por Filomena (de feito, a Axencia Estatal de Meteoroloxía sitúaa como a zona menos afectada) pero o frío acumulado nestes días na atmosfera está deixando tamén pegada, e poderá aparecer a neve esta fin de semana.
As temperaturas mínimas están acadando valores moi baixos: esta mañá, en Baltar chegouse aos -13,2ºC, en Calvos de Randín aos -13,1ºC, en Verín aos -10,6 e na Veiga aos -10,1ºC. En case toda Galicia, por mor do aire frío procedente do ártico e a estabilidade que achega o anticiclón, houbo importantes xeadas que levaron o termómetro baixo cero. Só estiveron por riba deste valor as zonas de costa.
Bo día! Continuamos cunha masa de aire moi fría de orixe ártica e a estabilidade atmosférica. Isto deixou unha longa noite de ceo despexado e vento en calma, polo que as xeadas son protagonistas indiscutibles en #Galicia. Soamente se libran algúns puntos do litoral (e non todos). pic.twitter.com/zBcqy0ZG3P
— MeteoGalicia (@MeteoGalicia) January 8, 2021
Neve a 300 metros
Porén, ás xeadas poderían sumarse durante a madrugada do venres ao sábado un episodio de neve en cotas excepcionalmente baixas. Segundo explica a previsión de MeteoGalicia, ao atoparse Galicia “nunha situación intermedia entre as altas presións do Atlántico e a borrasca do Mediterráneo”, o que “propicia a formación dun corredor de ventos do norte que traerán aire aínda máis frío que o de xornadas anteriores”, o que provocará chuvias na metade norte que, combinadas co frío, deixarán a cota de neve arredor dos 300-500 metros.
O mapa de avisos para a madrugada do sábado apunta a temperaturas baixo cero na beira pontevedresa do Miño e as comarcas do interior da provincia. Na montaña de Lugo e Ourense, o nivel amarelo actívase tamén por temperaturas inferiores a -6ºC e refachos de vento superiores a 80h km/h, o que fará moito máis intensa a sensación térmica de frío. No sur da provincia de Ourense, onde esta pasada madrugada xa se caeu dos -10ºC, as xeadas volverán ser intensas, polo que se activa o aviso laranxa.
A situación no mar tamén se complicará. Así, entre a ría de Muros e Noia e Bares haberá aviso laranxa por vento no mar de forza 8 entre as 18h e a medianoite do sábado. No resto do litoral, o aviso será amarelo po ventos de forza 7. Estes refachos intensificarán tamén a sensación térmica de frío.