Alberto Núñez Feijoo, na comparecencia deste venres. Imaxe: xunta.gal.
Alberto Núñez Feijoo, na comparecencia deste venres. Imaxe: xunta.gal.

Feijoo abre a porta a suspender o estudo de prevalencia do coronavirus

A dubidosa fiabilidade da enquisa pon en perigo a culminación dos 100.000 tests anunciados pola Xunta de Galicia

O estudo co que o Servizo Galego de Saúde tiña previsto analizar a circulación do coronavirus SARS-CoV-2 mediante análises a 100.000 persoas en Galicia, anunciado hai varias semanas como “a mostra epidemiolóxica máis grande que se fixo no Sergas“, podería quedar a metade de camiño. Así o avanzou o presidente da Xunta, Alberto Núñez Feijoo, na comparecencia posterior ao Consello da Xunta celebrado este venres. Horas antes, a Consellería de Sanidade anunciara a finalización da primeira fase da enquisa de seroprevalencia, na que se fixeron os 50.925 tests previstos. Entre 5.000 e 6.000 destas análises estanse a “cruzar” co estudo de prevalencia que deseñaron o Ministerio de Sanidad e o Instituto de Salud Carlos III, que analizará a unhas 6.100 persoas en Galicia. “Imos ver a primeira ondada, se hai no cruce algunha disfunción” entre ambas análises, e “tomaremos a decisión nas vindeiras semanas”. Deste xeito, o presidente galego abre a porta a paralizar o estudo, comezado o 23 de abril, e que neste tempo xerou dúbidas pola baixa taxa de positivos así como malestar entre profesionais sanitarios pola carga de traballo e recursos que supoñía.

Ata agora, a Xunta de Galicia mantiña a previsión dos 100.000 tests, en dúas ondas con catro semanas de diferencia, para ter unha imaxe máis completa da circulación do virus no territorio galego. Con todo, como xa manifestaran en datas anteriores expertos como Benito Regueiro, xefe de servizo de Microbioloxía do Chuvi e membro do comité de crise que asesora ao Goberno galego, prevíase que a circulación do virus fora moi baixa, o que leva a tomar precaucións ante unha posible segunda ondada.

Desde as primeiras xornadas da enquisa de prevalencia, os propios profesionais sanitarios manifestaron as súas dúbidas ante a fiabilidade dos tests utilizados (baseados na detección de anticorpos totais), e o método realizado (unha punción no dedo, cunha única mostra, a cada persoa participante). “Ou os tests non son fiables ou case ninguén estivo exposto ao virus”, era a idea que circulaba entre os profesionais sanitarios.

Do mesmo xeito, nos últimos días medrou o malestar entre os profesionais de Atención Primaria. O pasado martes, a Asociación Galega de Medicina Familiar e Comunitaria (Agamfec), que agrupa tamén a profesionais da Atención Primaria, fixo público un comunicado no que solicita “a finalización do actual estudo de seroprevalencia”.

Médicos de Atención Primaria piden ao Sergas que poña fin ao estudo do coronavirus

O Sergas avala a fiabilidade dos tests para a enquisa

Os dispositivos usados para a enquisa de prevalencia, da marca Wondfo, son os enviados polo Goberno central ás comunidades autónomas, e que foran obxecto de discusión no seu momento entre a Xunta e o Ministerio de Sanidad debido ás súas limitacións para realizar cribados de pacientes en residencias de maiores. Naquel momento, a comezos da Xunta o comité de xestión da crise que asesora á Xunta xa apuntara á posibilidade de usalos na enquisa epidemiolóxica que se anunciou días despois.

Na nota de prensa deste venres, na que se anunciaba a finalización da primeira fase, a Consellería de Sanidade respaldou a idoneidade destes tests para a enquisa de prevalencia. Despois de lembrar que “teñen o aval do Centro Nacional de Microbioloxia e do Instituto de Saúde Carlos III (ISCIII) do Ministerio de Sanidade”, Sanidade expón que “a avaliación interna dos test realizada polo Sergas co obxectivo de confirmar os datos de validez dos mesmos (análise de sensibilidade e especificidade), son concordantes cos obtidos polo Instituto de Saúde Carlos III.

Estes tests, segundo avanzara o ISCIII, teñen un valor sensibilidade do 64% cando non se coñece a data de inicio e aumentando a un 80% a partir dos 7 días do comezo da infección; e unha especificidade do 100%, é dicir, a probabilidade de ter falsos positivos é case nula.

Por outra banda, en Galicia segue en marcha o o ENE-COVID, nome que recibe a enquisa de seroprevalencia ideada polo Goberno estatal, que está a analizar. 6.120 persoas en Galicia. Segundo avanzou no seu momento a directora do ISCIII, Raquel Yotti, as persoas participantes recibirán “varias visitas”, ademais de cumprimentar un cuestionario, para “determinar se desenvolven anticorpos ao longo do período de estudo”, e abre a porta a “obter unha mostra de soro en todos os pacientes que dean o seu consentimento, que será analizado cunha técnica “máis sofisticada e máis precisa que os tests rápidos”.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.