España superou a China en número de mortos pola pandemia do coronavirus SARS-Cov-2, alcanzando a cifra de 3.434 falecementos, cunha suba de 738 decesos nas últimas 24 horas.
España xa é o segundo país do mundo con máis vítimas de coronavirus, só por detrás de Italia. Con 3.434 mortos, segundo o último balance ofrecido este mércores polo Ministerio de Sanidade, España adianta a China, onde se orixinou a epidemia e que conta con 3.287, mentres que Italia, con 6.820 contabilizados a última hora do martes, vai moi por diante.
O Goberno espera que a finais de semana poidan notarse os efectos do illamento, que este mércores busca ampliar no Congreso, que debate pola tarde a ampliación do estado de alarma ata o 11 de abril.
A pandemia do novo coronavirus superou a cifra dos 400.000 contaxios e causou a morte a máis de 18.900 persoas en todo o mundo, coa perspectiva de chegar a alcanzar esta mesma semana os 500.000 positivos se mantén o ritmo de crecemento actual.
Segundo o balance global actualizado este mércores pola Universidade Johns Hopkins, a pandemia do novo coronavirus estendeuse por 170 países e territorios, cun total de 424.048 persoas contaxiadas e 18.947 vítimas mortais.
O número de persoas que conseguiron curarse de COVID-19, a enfermidade xerada polo coronavirus, ascende a 109.145, a maioría delas en China (73.770). Os catro países máis afectados pola pandemia (China, Italia, Estados Unidos e España) suman máis de 248.000 casos, o que representa máis da metade do total de persoas contaxiadas co virus en todo o mundo.
O ritmo de crecemento da pandemia do novo coronavirus acelerouse de xeito moi pronunciado nas últimas semanas. Desde que comezou o brote na cidade de Wuhan en decembro de 2019 ata que se rexistraron os primeiros 100.000 casos transcorreron 67 días, mentres que a cifra de 200.000 positivos alcanzouse once días despois e a de 300.000 só catro días máis tarde, segundo a BBC.
Os 400.000 casos superáronse este martes, tres días despois de que o sábado se chegase á cifra de 300.000 positivos en todo o mundo. Se se mantén este ritmo de crecemento, o novo coronavirus alcanzará os 500.000 casos esta mesma semana.