As temperaturas do domingo foron altas, especialmente en áreas como A Coruña.
As temperaturas do domingo foron altas, especialmente en áreas como A Coruña.

A Coruña bate o rexistro da temperatura máxima en setembro: 35,4ºC

A cidade supera en máis de 3ºC o rexistro anterior, de 2018, un día antes de que se produza en Galicia unha baixada brusca de máis de 10ºC nas máximas

A Coruña viviu este domingo o día máis caloroso desde que existen rexistros no mes de setembro. O termómetro acadou os 35,4ºC pasadas as 14 horas, o que supón o valor máis alto, por riba do anterior máximo absoluto de 31,9ºC de 2018. Foi un día abafante no noroeste de Galicia, que levou a activar o aviso amarelo por temperaturas elevadas, debido a que o vento do sur reduciu o efecto de suavizar as temperaturas que achega a brisa mariña.

Así, outras localidades da provincia acadaron valores moi altos, como Culleredo (36,4ºC) Ferrol (36ºC), ou Carballo (35,9º). Tamén en Lugo se chegou aos 36,9ºC na estación da Aemet en Fingoi., segundo  O día foi igualmente caloroso na ribeira ourensá e pontevedresa do Miño, onde son máis habituais as temperaturas por riba dos 35ºC. Así, Ribadavia acadou o rexistro máis alto do territorio estatal, con 38,3ºC, e superáronse os 36ºC en Ponteareas ou Ourense.

Noite tropical

Antes da calorosa xornada do domingo, a madrugada marcou tamén rexistros moi altos de temperatura. No oeste de Galicia, en zonas como Fisterra, Carnota, Corrubedo, Vigo, superáronse os 22ºC durante boa parte da noite, o que se denomina como “noite tropical”, ao non caer os termómetros por baixo dos 20ºC. E mesmo en estacións montañosas, como a do Courel, a case 800 metros de altura, as condicións atmosféricas provocaron que non se caera dos 20ºC en toda a noite. Pola contra, nas chairas da Limia, o val de Monforte ou a Terra Chá, a temperatura chegou a estar por baixo dos 10ºC.

Forte descenso de temperaturas

Mais despois dun dos días máis calorosos do verán notaranse os efectos dunha borrasca que deixará precipitacións polo menos durante a primeira parte da semana. O mapa baixo estas liñas amosa o notable cambio: as temperaturas máximas caerán máis de 10ºC na cornixa atlántica da Península Ibérica, e as mínimas caerá ata 5ºC.

Variación das temperaturas máximas respecto ao día anterior

E a Aemet mesmo avanza un aviso de nivel amarelo por precipitacións e tormentas en boa parte de Lugo e Ourense, debido a cantidades superiores a 15 litros por metro cadrado nunha hora, como tamén advirte MeteoGalicia.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.