Touriñán marca o punto máis occidental de Galicia e o lugar de Europa que contempla o último solpor da Europa continental. Achegarse a esta pequena península, que se adentra no mar case 1 quilometro, constitúe un espectáculo para os sentidos. Entro os coídos de Balal e de Cuño, esta mole de granito ve como o océano Atlántico bate con forza contra os cantís e os veciños illotes da Ínsua e do Castelo.

A punta occidental do cabo, denominado Os Buxeirados, ofrece unha serie de laxes que penetran no mar uns 300 ou 400 metros, coñecidos como A Laxe de Buxeirados ou Baixos de Buxeirados, moi perigosa para a navegación, onde se teñen rexistrados algúns graves naufraxios.

Os toxos e as queiroas adornan a paisaxe, pola que discorre o Camiño dos Faros, un roteiro de máis de 200 quilómetros que une Malpica con Fisterra pola banda do mar.

O vello faro, cuxos restros podemos contemplar envoltos na ferruxe, foi inaugurado o 15 de decembro de 1898. O novo, que entrou en servizo en 1981, chega coa súa luz a 37 km dende os seus 61 metros de altitude.

Todos os anos, entre o 24 de marzo e o 24 de abril e dende o 18 de agosto ata o 19 de setembro, o Cabo Touriñán, en Muxía, na Costa da Morte, é o último lugar da Europa Continental no que se pon o sol. Ao longo do ano, non existe un único punto xeográfico fixo desde o que se contempla o último solpor nesta parte do planeta. Así, por mor da inclinación do eixo de rotación da terra sobre o plano da eclíptica, cinco lugares da costa atlántica europea, situados en Galicia, Portugal e Noruega, repártense esta honra. Un panel fronte ao faro explica esta circunstancia con varios gráficos.

O catedrático de Electromagnetismo na USC Jorge Mira Pérez publicou un artigo no que rastrexa a última posta de sol na Europa continental. Apareceu na revista Cartography and Geographic Information Science, incluída entre as de máis alto impacto no eido temático da Xeografía.

Xunto aos períodos nos que este último solpor se pode observar dende a terra galega, Jorge Mira sinala os outros catro emprazamentos: entre o 19 de outubro e o 21 de febreiro, o solpor da Europa continental localízase no Cabo de São Vicente en Portugal, ao que toma o relevo Cabo da Roca, tamén en territorio luso, entre o 21 de febreiro e poucos días despois do equinoccio de primavera e dende uns días antes do equinoccio de outono ata o 19 de outubro. As outras dúas localizacións destacadas son un lugar próximo a Aglapsvik, no sur continental de Tromsø (Noruega) aproximadamente do 24 de abril ao 1 de maio e do 11 ao 18 de agosto, e unha localización no municipio de Måsøy ao sur de Havøysund, tamén en Noruega (aproximadamente do 1 ao 11 de maio e do 1 ao 11 de agosto).