No universo que conforman o conxunto de enfermidades identificadas como cancros, os sarcomas teñen a característica diferencial de que non afectan a un órgano concreto, senón a músculo, cartilaxe, graxa, óso ou tecido de sostemento. Estes tumores malignos, que son unha variedade pouco común de cancro, inclúen, a súa vez, máis de 70 tipos de sarcoma considerados ultrararos pola súa baixa incidencia, ao afectar a unha persoa de cada millón. “Uns datos de frecuencia que fan que sexan patoloxías moi pouco estudadas que necesitan máis atención por parte da investigación e das administracións”, explica María Mayán Santos, investigadora principal de CellCOM, grupo de investigación de CINBIO especializado en comunicación celular en cancro e enfermidades asociadas á idade, que este venres recibirá a primeira bolsa Carolina Cerezo que outorga a Asociación de Sarcomas Grupo Asistencial (Asarga).
Máis coñecemento
Nun acto que se celebrará este venres a partir das 19.00 horas na sede de Afundación en Vigo, CellCOM recollerá unha bolsa de investigación, que lles permitirá ás e aos seus integrantes iniciar un proxecto para aumentar o coñecemento en sarcomas menos coñecidos e así poder atopar novas terapias e desenvolver métodos de diagnóstico. “Supón todo un reto abrir unha liña de investigación nova no noso grupo sobre tumores tan pouco frecuentes e tan pouco estudados. Poder achegar o noso coñecemento é un gran reto e empezamos cunha axuda dunha asociación de pacientes que están a facer un grande esforzo por recadar fondos para a investigación”, explica María Mayán sobre a bolsa de Asarga, financiada con fondos solidarios, recadados a través da venda do libro El sarcoma día a día, unha iniciativa da asociación, que este venres en Afundación tamén presentará o documental homónimo.
“Máis que nunca, sentimos máis comprometidos e con máis ganas de poñernos a traballar”, asegura a responsable de CellCOM, para quen Asarga “son un exemplo a seguir para a administración. A ciencia é a única ferramenta que temos para achegar solucións en forma de terapias ou marcadores de diagnóstico a estes pacientes, que maioritariamente son pacientes moi novos”. Precisamente, só 25 anos tiña cando morreu Carolina Cerezo, a moza malagueña que dá nome a bolsa que Asarga promove e coa que se lembra a loita desta muller, diagnosticada dun sarcoma raro, na procura de novos tratamentos que puideran funcionar no seu caso.
Obxectivos: sarcoma sinovial, subtipos de Ewing ou osteosarcoma
Coa experiencia adquirida logo de anos de traballo en cancro, con varias liñas de investigación, CellCOM comezará con esta bolsa a estudar sarcomas que afectan o tecido articular e óseo, no que teñen ampla experiencia. “Esperamos poder centrarnos no estado do sarcoma sinovial, algún dos subtipos de sarcoma de Ewing ou no osteosarcoma”, detalla María Mayán, que sinala que a razón de fixarse en sarcomas da articulación e do óso, responde a que coñecen ben estes tecidos ao traballar previamente e con unha ampla experiencia, en enfermidades da articulación.
A responsable do grupo de investigación do CINBIO –Centro cofinanciado con fondos FEDER– lembra que, hoxe en día, sábese que o cancro debe identificarse máis que polo lugar de desenvolvemento, polas marcas moleculares, “pero seguramente o lugar tamén importa polo que chamamos contorna ou microambiente tumoral, que é diferente e especial dependendo da zona onde se localiza o tumor”. CellCOM intentará na súa investigación entender algún destes tipos de tumores para ser quen de identificar marcas moleculares que axuden a desenvolver terapias ou métodos de diagnóstico máis precisos. “Os sarcomas están menos estudados, pero cada vez espertan maior interese pola necesidade de achegar solucións terapéuticas e porque afectan fundamentalmente a persoas mozas. Ademais, cada vez hai máis compromiso social para axudar e achegar solucións a este tipo de tumores”, afirma a responsable de CellCOM.
