O centro de investigación interuniversitario Ecobas, onde se inclue o grupo GEN da Universidade de Vigo, lidera o lanzamento dunha ferramenta baseada en intelixencia artificial que permite identificar recursos e oportunidades para impulsar a economía circular a partir de subprodutos da cadea de valor alimentaria da eurorrexión Galicia-norte de Portugal. Foi presentada no campus de Ourense no marco do proxecto transfronteirizo Bio Transfer GNP. Este Mapa de Recursos e Subprodutos para a Economía Circular na Industria Agroalimentaria ofrece información detallada sobre os sectores clave como o lácteo, cárnico, mariño, bebidas (viño, cervexa e sidra), froitas e verduras, e aceite.
A través da ferramenta pódense coñecer datos sobre residuos xerados nos procesos produtivos que poden ser relevantes para a economía circular, como volumes de produción, principais subprodutos, composición química e posibles vías de valorización. “Toda esta información está accesible mediante unha consulta a IA; pódense obter respostas claras sobre a composición de cada subproduto e as súas posibilidades de aproveitamento actuais e potenciais”, apuntan dende a iniciativa. Ademais, cuantifica e caracteriza subprodutos industriais da cadea de valor dos alimentos para facilitar a simbiose e xeración de biocompostos de alto valor engadido. Con isto quérese “transformar descartes produtivos en vectores de competitividade estratéxica na eurorrexión Galicia-norte de Portugal”.
A metodoloxía combina estatística oficial de produción sectorial con coeficientes técnicos de orixe bibliográfica e experimental, permitindo estimar con precisión o volume anual de subproduos ou residuos xerados, a súa caracterización físico-química e alternativas de valorización en diferentes usos industriais. Miguel Rodríguez, un dos líderes da iniciativa dende a UVigo, sinala que “a transición cara a un modelo produtivo circular e descarbonizado demanda superar a dispersión informativa e conectar con precisión a ciencia co tecido empresarial”.
Aplicacións
Entre as múltiples aplicacións da ferramenta de IA está a identificación de oportunidades de valorización. Por exemplo, os promotores sinalan que a industria conserveira de túnidos non só era biomasa residual: a súa composición revela dispoñibilidades cuantificables de compoñentes bioactivos como ácido hialurónico para a cosmética, hidroxiapatita para rexeneración ósea en odontoloxía e medicina, e hidrolizados proteicos (FPH) con propiedades antioxidantes e antihipertensivas.
Na actualidade, o mapa preséntase na súa primeira versión beta. Deste xeito, persoal investigador, pemes e xestores públicos poden “interrogar a base de datos de xeito aberto e flexible, consultando rutas de valorización sen barreiras informáticas”.
Podes acceder ao Mapa de recursos de economía circular na seguinte ligazón.
