Foto de familia do Congreso de Astronomía de Cuenca. Imaxe: Antonio Cebrián.
Foto de familia do Congreso de Astronomía de Cuenca. Imaxe: Antonio Cebrián.

Un día estelar para a astronomía galega

A Coruña acollerá entre o 30 de abril e o 3 de maio de 2020 o 24º Congreso Estatal de Astronomía, segundo se deu a coñecer na edición celebrada en Cuenca esta pasada fin de semana. A candidatura coruñesa, encabezada pola Agrupación Astronómica Ío, resultou elixida na votación diante da localidade catalana de Figueres.

O proxecto conta co apoio e o aval das entidades locais e rexionais, como o Concello da Coruña, os Museos Científicos Coruñeses, o Consorcio de Turismo, a Deputación Provincial, a Xunta de Galicia e a Universidade da Coruña (en cuxo Reitorado se celebrará o Congreso), ademais do patrocinio de empresas privadas.

A reunión terá lugar entre os días 30 de abril e 3 de maio de 2020

A reunión estatal de 2020 suporá un novo pulo para a divulgación científica na cidade e en toda Galicia, que xa conta con dous Destinos Starlight como Trevinca e as Illas Atlánticas. No congreso danse cita as asociacións astronómicas de toda España e centos de afeccionados a esta ciencia. O congreso, que leva máis de 40 anos celebrándose, ten por obxectivo dar a coñecer as experiencias e os avances en calquera campo da astronomía afeccionada, tanto no que se refire ás técnicas e procedementos de observación como á educación e divulgación da astronomía e as ciencias do espazo. Hai tamén lugar para os relatorios impartidos por persoas de prestixio mundial que dan conta de asuntos de especial actualidade e interese.

Premios para a astronomía galega

E ademais da gran noticia da escolla da Coruña para o congreso de 2020, houbo máis alegrías no encontro celebrado en Cuenca. Por primeira vez, a Federación de Asociaciones Astronómicas de España, co apoio da Sociedad Española de Astronomía, outorgou os Premios FAAE á Divulgación Astronómica 2018 que recoñecen o traballo de divulgación astronómica realizada por afeccionados e afeccionadas, buscando recompensar os esforzos excepcionais para involucrar á sociedade no coñecemento e observación do universo e a importancia na conservación do ceo escuro para a contemplación das estrellas como Patrimonio da Humanidade.

Na categoría masculina o premio foi para Martin Pawley, socio da ACC Ío, pola súa actividade de divulgación e sensibilización arredor da contaminación luminosa.

Por outra banda, entregáronse tamén os premios do concurso de Astrofotografía organizado ao abeiro do Congreso, e varios socios da asociación Ío foron recoñecidos. Alfredo Madrigal venceu nas categorías de Time-Lapse e Gran Campo e tamén recibiu premio ao mellor traballo do concurso. Tamén gañou César Blanco, 1º clasificado na categoría de Ceo Profundo. Óscar Blanco levou o 2º premio na categoría Gran Campo, e Ángel R. Arós foi recoñecido coma o 4º mellor do concurso xeral que valoraba fotografía e time-lapse.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.