Venres 29 Marzo 2024

O galego Manuel Carreiras gaña o Premio Nacional de Investigación

O xurado valora o 'extraordinario valor' do traballo científico realizado por este psicólogo, que actualmente traballa no Ikerbasque

O psicólogo galego Manuel Carreiras Valiña foi proclamado hoxe Premio Nacional ‘Pascual Madoz’ de Investigación en Dereito, Ciencias Económicas e Sociais. O xurado do galardón, que concede o Ministerio de Ciencia, Innovación e Universidades, destaca a súa condición de “referencia internacional no eido do procesamento da linguaxe e no ámbito da psicoloxía experimental, destacando a súa capacidade para crear grupos de excelencia e de transferencia de coñecemento”. Segundo o xurado: “O seu traballo posúe un interese e impacto social extraordinario“.

Lucense nado en 1959, Carreiras Valiña formouse na Universidade de Santiago de Compostela e completou a súa traxectoria académica cunha ampla colaboración internacional, con estadías de investigación nos Estados Unidos, Suecia ou Reino Unido.

Publicidade

Licenciado en Psicoloxía pola USC, é doutor pola Universidade de La Laguna. Na actualidade é profesor de investigación no Ikerbasque e director científico do BERC (Centro de Investigación Básica e de Excelencia de Euskadi) e o BCBL (Basque Center on Cognition, Brain and Language), e unha das figuras internacionais máis relevantes no campo da neurociencia cognitiva, e en particular no procesamento da lectura, a linguaxe e o bilingüismo.

Valentin Fuster, Angela Nieto, Susana Marcos, Manuel Carreiras e Mercedes Garcia Arenal, Premios Nacionais de Investigación.

En 2008 estableceuse en Euskadi, recrutado por Ikerbasque, para fundar e dirixir o BERC BCBL. Grazas ao seu labor, o BCBL situouse entre os mellores centros de Europa e do mundo no seu ámbito. Conta tamén coa acreditación Severo Ochoa.

A visión de Manuel Carreiras do centro de excelencia BCBL fundaméntase na atracción de investigadores de excelencia de todo o mundo, dotándoo dun equipamento de investigación punteiro.

O novo Premio Nacional de Investigación traballa en tres grandes liñas: a linguaxe, a lectura e os trastornos do desenvolvemento; o multilingüismo e a aprendizaxe dunha segunda lingua; a neurodexeneración, o dano cerebral e o envellecemento saudable.

O Ministerio de Ciencia, Innovación e Universidades concedeu tamén os Premios Nacionais de Investigación 2019 noutras categorías a Valentín Fuster, Ángela Nieto, Susana Marcos e Mercedes García-Arenal.

O ministro de Ciencia, Innovación e Universidades en funcións, Pedro Duque, comunicou aos premiados o fallo do xurado e felicitoulles en nome do Goberno. Os Premios Nacionais de Investigación, creados en 1982, supoñen o recoñecemento máis importante de España no ámbito da investigación científica. Teñen como obxectivo distinguir o mérito daqueles investigadores e investigadoras de nacionalidade española que estean a realizar un labor destacado en campos científicos de relevancia internacional e que contribúan excepcionalmente ao avance da ciencia, á transferencia de tecnoloxía e ao progreso da humanidade. Estes galardóns contan cunha contía total de 150.000 euros, 30.000 euros cada premio.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Así funciona a mente dun psicópata

Como funciona o cerebro destas persoas? Investigadores da Universidade Internacional da Rioja analizan o seu comportamento

Ansiedade pola crise climática: “Nada parece útil para salvar o planeta do seu inexorable final”

As respostas emocionais ante as ameazas ambientais que poñen en perigo o futuro da Terra son cada vez máis comúns na poboación

“Os meus pensamentos esgótanme”: como escapar do bucle obsesivo das rumiacións

Hai pensamentos negativos e recorrentes que colonizan o noso cerebro. Que mecanismos cerebrais se poñen en marcha? Como podemos paralos?

Por que é preocupante que os nenos non xoguen tanto como antes

As potencialidades deste desfrute están na base do desenvolvemento das capacidades de resolución de problemas, cognitivas e socioemocionais