Isto é o que sabemos do novo obxecto interestelar que se achega a nós

No Sistema Solar, hai máis de 6.300 cometas coñecidos. Hai millóns de asteroides. E, de todos eses obxectos, só sabemos que ‘Oumuamua , un asteroide vermello con forma de cigarro, provén doutros lugares. Pero un novo descubrimento, revelado a semana pasada, entusiasmou aos astrónomos. Poida que teñamos atopado un segundo obxecto que procede do espazo interestelar.

Un cometa chamado C/2019 Q4 (Borisov), descuberto o 30 de agosto polo astrónomo afeccionado de Crimea Gennady Borisov , ten unha traxectoria e velocidade que suxire que o obxecto se orixinou fóra do Sistema Solar. Os ollos telescópicos dirixíronse á localización do cometa para tratar de extraer tanta información como sexa humanamente posible. E a finais da semana pasada, obtivemos a nosa primeira foto a todo cor, que amosa a desgasificación distintiva asociada cun corpo de cometa xeado que se achega ao Sol.

Publicidade

Agora chegan os primeiros estudos do fenómeno. Dous equipos distintos analizaron o cometa: un observando a cor do obxecto e outro o seu espectro, para ver se podían aprender máis sobre a composición do estraño corpo. O seu traballo aínda non se revisou por pares, pero podemos comezar a ver os seus achados xunto coa comunidade científica.

Os cometas e os asteroides son dous tipos distintos de obxectos espaciais. Os asteroides son grandes anacos de rocha e metal. Mentres que os cometas están feitos de xeo e rocha. Cando viaxan preto do Sol, a calor produce unha nube de vapor e po arredor do cometa, que tamén se afasta da fonte de calor, creando a famosa cola cometaria.

Neste contexto, Oumuamua é un bicho raro que exhibe características tanto dun cometa como dun asteroide; ou, para algúns expertos, de ningún dos dous. Sabemos como son os cometas no Sistema Solar: os tipos de gases que emiten e o seu tamaño. Mesmo sabemos tamén un pouco acerca dos exocometas que orbitan estrelas alieníxenas. Por exemplo, detectáronse cometas orbitando a estrela Beta Pictoris.

Os científicos xa descubriron exocometas que orbitan estrelas alieníxenas

 A medida que o cometa pasa entre nós e a estrela, a calidade da luz da estrela cambia de acordo coa química do cometa. Eses exocometas son moi parecidos aos nosos. Pero un cometa interestelar sería unha oportunidade para estudar de preto canto de semellantes ou diferentes son noutros sistemas estelares.

Segundo os dous documentos adiantados polos científicos, C/2019 Q4 (Borisov) parécese moito aos nosos cometas do Sistema Solar. O primeiro artigo está dirixido por Piotr Guzik e Michal Drahus da Universidade Jagellonian en Polonia, e atópase en arXiv ; o outro está dirixido pola astrónoma Julia de León do Instituto de Astrofísica de Canarias e publicado no sitio web do Instituto.

Guzik e os seus colegas basearon as súas conclusións nos datos ópticos obtidos polo telescopio William Herschel e o telescopio Gemini North. Analizaron as magnitudes vermella e verde e descubriron que a cor do cometa, moi verde e non moi vermello, é esencialmente a mesma que o dos cometas de período longo do Sistema Solar que se orixinan na Nube de Oort.

Pola súa banda, De León e os seus colegas estudaron o cometa usando o Gran Telescopio Canarias, obtendo tres espectros visibles do cometa usando o instrumento OSIRIS para analizar a súa composición química. Estes tamén amosaron que o cometa é similar aos cometas de período longo do Sistema Solar.

“Isto suxire que os cometas formados noutras estrelas [sic] poden ter unha composición similar aos formados no Sistema Solar e, polo tanto, poden ser producidos por procesos similares”, explicaron os investigadores polacos.

Sobre o tamaño deste obxecto, que segue unha traxectoria rara e semella proceder do espazo interestelar, o seu diámetro é de entre 2 e 16 quilómetros; e polo tanto moito máis grande que os 170 metros de Oumuamua.

A orixe do cometa tamén está por verificarse. Probablemente tomará meses de observacións para ter unha comprensión mellor da súa traxectoria. Con todo, a gran diferenza con Oumuamua, que só se descubriu cando xa estaba a regresar do Sistema Solar, o C/2019 Q4 ( Borisov) aínda se dirixe cara a dentro. Os astrónomos cren que alcanzará o perihelio, a súa aproximación máis próxima ao Sol, ao redor do 8 de decembro de 2019. Nese momento poida que teñamos imaxes máis claras deste obxecto sobre o que a súa orixe segue a ser un misterio.

Aquí podes ver a investigación dos científicos da Universidade Jagellonian en Polonia e a do Instituto de Astrofísica de Canarias