O investigador César de la Fuente (A Coruña, 1986) recibe un novo recoñecemento á súa prometedora traxectoria. O Instituto Americano de Enxeñeiros Químicos (AIChE) vén de premialo co primeiro Premio Langer á innovación e excelencia en emprendemento. Este galardón outórgase na honra de Robert Langer (Albany-Nova York, 1948), un dos enxeñeiros máis prestixiosos e citados da historia, que recibiu, entre outros premios, o Príncipe de Asturias ou o Breakthrough Prize en Ciencias da Vida.
O premio Langer, creado este mesmo ano, ten por obxectivo apoiar aos talentos emerxentes nas primeiras etapas da súa carreira, e promover a creatividade dos investigadores para afrontar desafíos de alto risco e alto impacto e así acadar avances disruptivos. O científico galego recibirá da fundación AIChE unha axuda de máis de 100.000 dólares para avanzar nas súas liñas de investigación.
De la Fuente, actualmente profesor e investigador nos departamentos de bioenxeñaría, microbioloxía e psiquiatría da universidade de Pennsylvania, é un dos máis prometedores científicos no estudo da ameaza da resistencia bacteriana. Dirixe na actualidade o grupo Machine Biology, onde afonda no deseño de proteínas, bioloxía sintética, bioenxeñería, microbioloxía e bioloxía computacional para achegar novas terapias contra doenzas infecciosas, pero tamén fronte ao cancro. Os seus achados xa deron pé a numerosas patentes e máis de 70 publicacións. En 2019, César foi escollido polo MIT Technology Review como un dos mozos menores de 35 anos máis innovadores a nivel mundial polas súas investigacións, e foi tamén elixido no Top-10-Under-40, ademais de recibir o premio como mellor investigador novo da Sociedade Hispánica de Enxeñeiros.
César de la Fuente é licenciado en Biotecnoloxía pola Universidad de León e realizou o seu doutoramento no laboratorio do doutor Robert Hancock, na Universidade de British Columbia, en Vancouver Canadá), onde se especializou no descubrimento de novas terapias para o o tratamento das infeccións bacterianas. Ten recibido numerosos recoñecementos de institucións de prestixio como o propio MIT, a Harvard Medical School, a Sociedade Americana de Microbioloxía, a Fundación Ramón Areces ou la Caixa.
Aquí podes ler a entrevista que GCiencia lle fixo hai uns meses:
César de la Fuente: “No 2050, as superbacterias poderían ser a maior causa de morte”