Este venres 24 de xuño, coincidindo coa madrugada da popular noite de San Xoán, a Lúa incorpórase no ceo á sorprendente aliñación planetaria formada por Mercurio, Venus, Marte, Xúpiter e Saturno. O satélite da Terra situarase entre Venus e Marte, e será visible de madrugada, unha hora antes do amencer mirando cara ao oeste.
No mes de maio, os expertos xa prevían este fenómeno tan especial, que non acontecía dende 2014 e que tardará en volver suceder, polo menos, 18 anos máis. Coa chegada do mes de xuño, percibíronse os primeiros planetas, aliñados no ceo. Así, ao amencer e sen necesidade de telescopio, podíanse ver perfectamente Mercurio, Venus Marte, Xúpiter e Saturno. A eles uníronse tamén os planetas que requerían dunha ferramenta especializada para ser observados: Urano e Neptuno. Hoxe complétase o escenario planetario coa presenza da Lúa na aliñación que durará ata que finalice o mes.
José Ángel Docobo, director do observatorio astronómico Ramón María Aller Ulloa, da Universidade de Santiago de Compostela (USC), comentaba para un artigo de GCiencia que este feito é algo moi curioso. “Por orde, primeiro estará Mercurio, logo Venus, Marte, Xúpiter e por último Saturno. Ademais os outros dous planetas, que únicamente poderán ser vistos cun telescopio, posicionaranse entre os xa mencionados: Urano no medio de Venus e Marte e Neptuno entre Xúpiter e Santurno”.
Os fenómenos astronómicos do verán
Na semana do solsticio de verán, o Real Observatorio Astronómico de Madrid indicou na súa conta de Twitter que ademais de este fenómeno planetario, tras a posta do Sol pódese apreciar ao horizonte o chamado “triángulo do verán”, composto polas estrelas Vega, Deneb e Altair.
Pola súa parte, Docobo alega que durante os vindeiros meses de verán, en Galicia, non contaremos con eclipses observables e que o feito que máis destacará esta temporada será a curiosa aliñación planetaria deste mes de xuño. Por outro lado, explica o astrónomo, as perseidas terán problemas para ser vistas desde a Terra este ano, xa que coincidirá coa fase de Lúa chea, cuxa iluminación entorpecerá a observación da chuvia de estrelas.
Ademais, o Instituto Xeográfico Nacional publicou nun fío de Twitter as 10 curiosidades deste verán 2022. Entre elas destacan que próximo 4 de xullo será o día de máximo afastamento anual (afelio) entre a Terra e o Sol.
