A eclipse do pasado 12 de agosto reclamou a atención mediática pola singularidade do vento, pero aos amates da observación astral aínda lles quedan varias citas co ceo por diante antes de rematar o ano. O Instituto Xeográfico Nacional (IGN) vén de compartir o calendario astronómico para o mes de setembro na súa conta de X (antes Twitter).
Durante o mes de setembro terá lugar o cambio de estación, que, como explica o Real Observatorio do IGN, pasará a ser o outono no hemisferio norte e a primavera no sur. A transición será o día 23 ás 02:05 horas, mais, antes desa xornada, abondarán as razóns para alzar a vista cara ao ceo nocturno.
Unha conxunción planetaria
O venres 4 pola noite, a Lúa entrará no seu cuarto minguante. É, como explican dende eltiempo, un punto de inflexión dentro do ciclo lunar no que o astro comeza a retraerse despois de lucir cheo. A súa forma estréitase e, mentres que a parte esquerda do disco lunar aínda recibe luz do Sol, o corpo celeste comeza a ocultarse no seu camiño cara á próxima lúa nova.
A semana concluirá cunha conxunción astral que se manterá nos amenceres dos días 6 a 9. Xúpiter e Marte irán aliñándose progresivamente co satélite terrestre. Este evento, como apunta o IGN, poderá observarse a simple vista, sempre que se estea nun lugar escuro.
A evolución da Lúa cara Venus
O venres 11, o satélite terrestre desaparecerá do firmamento ao entrar na fase de lúa nova. A escuridade consecuente será especialmente axeitada para observar as estrelas sen as inteferencias luminosas do corpo celeste. Uns días despois, entre o 13 e o 14 no solpor, poderá verse unha conxunción da Lúa con Venus.
O día 18, o satélite da Terra entrará en cuarto crecente: a metade dereita do seu disco aparecerá iluminada, formando unha ‘D’ antes de retoma o seu camiño cara á fase de lúa chea.
O cambio de estación
O mércores 23 terá lugar un dos dous equioccios que se producen cada ano: trátase do instante no que o Sol está situado sobre a liña do ecuador. Nese momento, o día e a noite teñen unha duración similar ao longo do globo e, ademais, marca o inicio do outono no hemisferio norte. A partir deste punto, as noites comezarán a gañarlle terreo ao día ata o solsticio de inverno.
Tres días despois, o 26, a Lúa acadará a súa plenitude. O amencer do día 27 poderá observarse a conxunción do satélite con Saturno, o que porá fin ás citas astronómicas do mes de setembro.
