Este sábado 20 de marzo, ás 10 horas, 37 minutos e 23 segundos, chega a primavera ao hemisferio norte. Será o equinoccio, que marca o inicio da devandita estación. Uns días máis tarde, o vindeiro domingo 28 de marzo, chega outro cambio importante: ás 2.00 horas, os reloxos adiantaranse ás 3.00, co conseguinte aumento súbito de horas de luz na parte final de cada día. A estación concluirá co solsticio de verán, o 21 de xuño.
Dende o solsticio de inverno os días van gañando tempo de luz. É algo que, no mes de marzo e abril, preto do equinoccio (o 20 de marzo este 2021), percibimos de xeito moi notable. E non é para menos: ao longo do mes de marzo gañamos arredor dunha hora e media de luz en total.
Deste xeito, por exemplo, en Compostela houbo o día 1 de marzo 11 horas e 14 minutos de luz, pero rematará o mes con 12 horas e 42 minutos de luz previstas para o 1 de abril.
Pero o día que ten exactamente as mesmas horas de noite que de luz non coincide co propio equinoccio. Ese día ten nome: é o Equilux, e chegará a Galicia este mércores 17 de marzo, tres días antes do comezo da primavera.
Por que acontece isto? Temos que ter en conta que o Sol non é un punto no ceo, senón un disco. Se consideramos que o Sol se pon cando o seu centro cae por baixo do horizonte, sería precisamente o día do equinoccio cando as horas do día e a noite serían iguais. Pero ese espazo entre o centro e o límite do disco provoca que haxa un tempo máis de luz tanto cando sae pola mañá, como cando se oculta pola noite. Dese xeito, o día no que hai 12 horas de luz e de escuridade é uns días antes do equinoccio de primavera e uns días despois do equinoccio de outono.
Para rematar, poderíamos discutir que é exactamente o horizonte. E ter en conta tamén o feito de que a propia atmosfera da Terra tamén inflúe na visión da luz, por efecto da súa refracción. Pero todo isto non afecta á base do que aquí falamos: o Equilux. Que chegará este mércores, 17 de marzo a Galicia. Aproximadamente co mesmo tempo de luz e de noite.
Nesta ligazón de Meteogalicia podes comprobar cando é o solpor e o orto na túa localidade. E comprobar que día se igualan… O Equilux
