O cohete Starship, da compañía Space X, estoupou tan só uns minutos despois do seu despegue. Esta é a nave coa que Elon Musk pretende impulsar as viaxes espaciais á Lúa e Marte. O seu lanzamento produciuse ás 15.30 da tarde, hora peninsular, dende a base da empresa en Texas, Estados Unidos. Pese a que o cohete se desintegrou pouco despois do despegue, a compañía de Musk considérao un éxito. “Cunha proba coma esta, o éxito mídese polo moito que podemos aprender”, escribiron na canle de Twitter de Space X. O propio Musk, a través da súa conta na rede social, felicitou ao seu equipo polo “emocionante lanzamento de proba”. E reiterou o moito que aprenderon de cara a un seguinte despegue, que se realizará nos próximos meses.
O lanzamento estaba previsto para o luns, pero o fallo nunha válvula de despegue obrigou a aprazar a data. Este xoves tamén se fixeron probas momentos antes do despegue de Starship, detendo a conta atrás a 40 segundos do acendido, segundo informan en El País. A nave voou finalmente polos aires no que a compañía definiu como “desintegración non programada”. Aínda así, Space X considerou a proba un éxito. De feito, o administrador da NASA, Bill Nelson, tamén feliciou á empresa a través da súa canle de Twitter. “Todos os grandes logros da historia esixiron un certo nivel de risco calculado, porque un gran risco deriva nunha gran recompensa”, escribiu.
Starship, de feito, xoga un papel fundamental na nova carreira cara á Lúa que está impulsando a NASA, que ten previsto enviar catro novos astronautas en 2025. A nave de Musk sería, en teoría, a encargada de realizar o traxecto espcial pero hai posibilidades que, tras o fallo de hoxe, a data prevista se poida retrasar. Tanto Musk como Nelson fixeron referencia na súa canle de Twitter aos próximos intentos de voo de Starship. “Esperamos con impaciencia todo lo que aprenda Space X, ata a próxima proba de voo… E máis alá”, di o administrador da NASA.
