En tan só dous días, cinco asteroides pasarán preto da Terra. Así o confirma a NASA a través da súa aplicación Eyes on Asteroids, que rastrexa todos os obxectos, sexan meteoritos ou cometas, que se achegan ao noso planeta. Malia que todos pasarán a menos de 7,5 millóns de quilómetros da Terra, ningún supera os 150 metros de tamaño, polo que non son considerados potencialmente perigosos pola NASA.
Dous deles pasarán preto da Terra este luns 11 de setembro. Trátase dos asteroides 2023 RU e 2023 RK, de 26,1 metros e 23,8 metros respectivamente. É dicir, do tamaño dun avión, segundo especifica a NASA. O primeiro acadará a súa máxima aproximación ao planeta sobre as 17.00 horas, a unha distancia de 4.062.490 quilómetros. No que respecta a 2023 RK, achegarase a 6.111.969 quilómetros da Terra, alcanzando o seu máximo arredor das 19 horas.
Os outros tres asteroides aproximaranse este martes. Está previso que RC1, de 6,4 metros —é dicir, do tamaño dun autobús— se achegue sobre as 8 horas do 12 de setembro a uns 1.203.038 quilómetros. No que respecta ao asteroide RO1, aproximarase sobre as 9.30 horas á Terra. Cun tamaño de 21,7 metros, a súa distancia será de 2.514.502 quilómetros. Finalmente, o obxecto RT2 de 8,1 metros pasará sobre as 8.30 horas a unha distancia de 4.209.911 quilómetros.
Hai risco para a poboación?
De todos modos, ningún destes obxectos é potencialmente perigoso. Dende o portal de noticias Live Science explican que, se o prognóstico da NASA fose errado e finalmente os asteroides chocasen contra a Terra, “non provocarían un evento catastrófico”. De todos modos, isto non significa que non supuxesen ningún risco para a poboación. Dende a páxina web sinalan a explosión dun asteroide en 2021 en Vermont, Estados Unidos, e a doutro en 2013, en Rusia. Ao parecer, este último xerou unha explosión que feriu a 1.500 persoas.
Por este motivo, as axencias espaciais de todo o mundo xa están a traballar en posibles formas de desviar asteroides perigosos se algunha vez estivesen en risco de chocar contra a Terra. O 26 de setembro de 2022, a nave espacial Proba de redirección de dobre asteroide (DART) redirixiu o asteroide Dimorphos ao desvialo do seu curso, alterando a súa órbita en 32 minutos na primeira proba do sistema de defensa planetaria da Terra. Desde entón, a NASA aclamou a misión como un éxito que superou todas as expectativas.
