Super Planet Crash: crea o teu propio sistema planetario

Créditos do xogo e licenza BY-NC-ND CC: Stefano Meschiari (U. Texas en Austin)Explicación: sabes crear un sistema planetario que dure 500 anos? O xogo que presentamos, Super Planet Crash, permíteche tentalo. Para crear ata dez planetas só tes que premer en calquera lugar preto da estrela central. Os tipos de planetas poden escolmarse á esquerda en orde de maior masa: Terra, Súper-Terra, Xigante de xeo, Planeta xigante, Anana marrón ou Estrela anana. Cada planeta é atraído gravitatoriamente non só pola estrela central de tipo solar, senón tamén polos outros planetas. O premio son puntos, con factores de bonificación aplicados polo aumento de poboación planetaria e os sistemas habitables. O xogo remata tras 500 anos ou cando un planeta é expulsado gravitatoriamente. Estanse a descubrir moitos sistemas exoplanetarios nos últimos anos e Super Planet Crash demostra por que algúns fican estables. Como podes sospeitar, despois de xogar ao Super Planet Crash unhas poucas veces, hai unha razón para crer que o noso propio Sistema Solar chegou a perder planetas durante a súa formación.