Explicación: Cando se fixo Orión tan rechamangueiro? Esta interpretación colorida de parte da constelación de Orión débese á luz vermella emitida polo hidróxeno mailo xofre(SII), e a luz verde-azulada emitida polo osíxeno (OIII). Así que as cores da imaxe publicada foron reasignadas dixitalmente para representar as súas orixes elementais; pero tamén para seren abraiantes ao ollo humano. A espectacular composición foi realizada coidadosamente a partires de centos de imaxes que levaron case 200 horas recompilar. Na fotografía, o bucle de Barnard, atravesando a parte inferior da imaxe, semella mexer creacións interestales que inclúen a intrincada nebulosa de Orión, que se observa xusto á dereita do centro. A nebulosa da Chama tamén pode localizarse axiña, pero a un ollo atento cóstale identificar a lixeira marca da escura nebulosa Cabeza de Cabalo. Así como Orión é charramangueiro, unha explicación factible da orixe do bucle de Barnard estaría nun estourido de supernova que aconteceu hai uns dous millóns de anos.
