16.00: Aquí podes ler a información ampliada sobre a primeira imaxe de Saxitario A*, o buraco negro do centro da Vía Láctea:
Captada a primeira imaxe histórica do buraco negro do centro da galaxia
15.45. “Grazas ao Event Horizon Telescope obtivemos a primeira confirmación visual de que o obxecto do centro da galaxia é, case con toda seguridade, un buraco negro con propiedades que concordan coa Teoría da Relatividade Xeral de Einstein”, di José Luis Gómez, do Instituto de Astrofísica de Andalucía.
15.42. A imaxe mostra o gas brillante que orbita ao redor do buraco negro. A rexión central escura está rodeada por unha estrutura brillante con forma de anel. A luz se curva pola poderosa gravidade do buraco negro, catro millóns de veces máis masivo que o noso sol.
15.10: Conseguen capturar a primeira imaxe de Saxitario A*, o buraco negro no centro da nosa galaxia.
Esta es la primera imagen histórica de Sagitario A*, el agujero negro supermasivo situado en el centro de nuestra galaxia. Es la primera prueba visual directa de su presencia. Ha sido captada por el @ehtelescope, un telescopio del tamaño de la Tierra.
➡️https://t.co/H4fl58YUaY pic.twitter.com/39aKdG8GcJ— CSIC (@CSIC) May 12, 2022
14.50: Quedan 10 minutos para que comece a rolda de prensa do Observatorio Europeo Austral e o Event Horizon Telescope. Pódese seguir a través desta ligazón.
14.50: “Esta é a exitosa continuación de abril de 2019. Naquel momento presentouse a primeira imaxe dun buraco negro. Hoxe asistiremos á presentación de novos resultados revolucionarios, imaxes e evidencias científicas que transformarán a nosa concepción do universo”, Rosa Menéndez, presidenta do CSIC.
14.45: Comeza a rolda de prensa do CSIC en Madrid.
14.40: Os buracos negros son obxectos cósmicos que albergan unhas masas enormes en tamaños moi compactos. Son extremadamente difíciles de visualizar porque son practicamente invisibles e absorben toda a radiación electromagnética. Todo o que se pode esperar é ver o seu “horizonte de eventos”. É dicir, a súa contorna, que representa o lugar onde a luz xa non pode escapar das forzas gravitatorias do buraco negro.
14.20: Para tratar de entender como é posible sacar unha fotografía dun buraco negro, podemos ver esta charla TED de 2016. A astrónoma Katie Bouman, que integra o Event Horizon Telescope, explica neste vídeo como se captura unha imaxe da “escuridade definitiva”:
14.10: A rede do Event Horizon Telescope é unha colaboración internacional con varias estacións arredor do planeta. O seu obxectivo é funcionar como un telescopio único para abranguer o maior espazo posible para a tomar de datos. Céntranse no estudo dos buracos negros Saxitario A*, na Vía Láctea, e M87, no cúmulo de Virgo.
13.50: O equipo do Event Horizon Telescope (EHT), que dará hoxe a rolda de prensa, tamén é o responsable dun dos grandes fitos científicos da historia da ciencia. En 2019 lograron capturar a primeira imaxe dun buraco negro. Naquela ocasión tratábase dun obxecto situado no centro de Messier 87, unha galaxia masiva situada no cúmulo de Virgo. Un buraco negro que se atopa a 55 millóns de anos luz da Terra e é 6.500 millóns de veces máis masivo ca o Sol. Unha imaxe que fixo historia ao lograr demostrar a existencia dos buracos negros.
A ciencia supera unha nova fronteira: a primeira imaxe dun buraco negro
13.30: De momento, descoñécense os detalles sobre o anuncio. Tan só transcendeu que se tratará dunha información relacionada con Saxitario A*, situado no centro da Vía Láctea. É un buraco negro supermasivo a uns 26.000 anos luz de distancia da Terra e cunha masa equivalente a catro millóns de soles. Segundo avanzan distintos medios, entre o que se atopa o portal de noticias científicas ScienceAlert, pode que o equipo do Event Horizon Telescope (EHT) conseguira capturar a primeira imaxe de Saxitario A*. Polo de agora tan só son hipóteses. Haberá que esperar á rolda de prensa, que comezará ás 15.00 horas deste xoves.
O Observatorio Europeo Austral (ESO) e un equipo do Event Horizon Telescope (EHT) anuncian “resultados revolucionarios” sobre o buraco negro do centro da nosa galaxia, a Vía Láctea. Para iso, celébranse varias roldas de prensa simultáneas arredor do planeta. En castelán, esta “información sen precedentes” presentarase dende Santiago de Chile, por parte de representantes do observatorio ALMA. Tamén se celebra unha rolda de prensa en Madrid por parte do CSIC.
