Dun xoves cun sol radiante a fortes treboadas. Meteogalicia lanzou unha alerta para esta mesma tarde que afecta, sobre todo, ao centro e sur de Galicia. A inestabilidade atmosférica vai en aumento e a choiva chega a practicamente toda a comunidade cunha borrasca que impactará inicialmente no centro e no sur.
A alerta amarela afectará a zonas do interior de Pontevedra e da Coruña, así como o sur de Ourense e de Lugo. Tamén están alertadas por estes chuvascos tormentosos as áreas próximas ao Miño a partir da metade sur de Galicia. Algúns dos concellos afectados serán Santiago de Compostela, Ourense, Lalín e As Pontes de García Rodríguez.
Estas treboadas irán espallándose por toda a provincia de Ourense e tamén cara ao centro de Lugo durante o venres. O sábado a alerta manterase no interior da Coruña, Pontevedra, no sur de Lugo e no noroeste de Ourense.
A borrasca xa chegou á parte sur de Ourense, e nalgúns puntos do sur e do interior de Pontevedra xa se están a rexistrar algunhas precipitacións. Este xoves a choiva non chegará con tanta forza nas zonas do litoral aínda que non se descarta. Os ventos do nordés tamén evitarán que as bategadas cheguen tan ao norte, segundo indican as previsións meteorolóxicas.
Leve descenso das máximas
A fronte entrará nesta tarde do xoves en varios puntos de Galicia sen grandes cambios nas temperaturas. Iso si, as máximas baixarán nas Rías Baixas. Algo máis de frío en Lugo, os valores máis altos descenderán ata os 13 graos no domingo, aínda que irá recuperando a temperatura no medio prazo ata acadar os 19. Un anticiclón situado no norte de Europa é o responsable da circulación deste aire máis frío e que non permite tempos máis próximos aos do verán.
A fin de semana contará, segundo Meteogalicia, con ceos nubrados con chuvascos e tormentas. A dinámica será nestes días parecida á do xoves, cun tempo máis moderado e con menor probabilidade de precipitacións pola mañá e choivas máis intensas pola tarde. Esa fórmula cambiará o domingo, cando as chuvias máis intensas chegarán pola mañá, segundo Meteogalicia. Ese mesmo día, preto das 17:00 da tarde, a situación comezará a mellorar aínda que haberá precipitacións nalgunhas zonas de Galicia ata o martes.
O vento soprará de forma moderada a partir desta mesma tarde. Entre Bares e Fisterra terá maior forza mentres no resto da comunidade será frouxo pero con certa variabilidade. A axencia meteorolóxica galega tamén indica que nesas mesmas zonas e ata Cabo Prior haberá unha forte marusía.
