Como delegada institucional do Consello Superior de Investigacións Científicas (CSIC) en Galicia é para min unha satisfacción felicitar a Gciencia polo seu décimo aniversario.
As actividades de divulgación e de cultura científica e tecnolóxica son recoñecidas na Lei 14/2011, da Ciencia, a Tecnoloxía e a Innovación, modificada pola Lei 17/2022, como consustanciais á carreira investigadora. Por iso, unha das misións do CSIC é promover e traballar este tipo de actividades.
No CSIC faise ciencia e tecnoloxía xerando contidos científico-técnicos que se difunden a través das ferramentas habituais no ámbito académico. Con todo, resulta necesario transmitir tamén aos medios de comunicación, xeralmente a través de Departamentos e/ou Unidades integradas no noso organigrama, aqueles que son de interese xeral conforme a valores-noticia. Tamén, atendemos aquelas solicitudes de medios de comunicación que acoden a nós en busca de fontes expertas para contextualizar e entender a actualidade relacionada coa ciencia e a tecnoloxía.
Neste labor, neste cometido clave para incrementar a cultura científico-técnica da sociedade, é fundamental dispoñer de medios de comunicación e de profesionais especializados en ciencia e tecnoloxía. É aí onde cabe aplaudir a posta en marcha, hai 10 anos, do portal Gciencia, e o seu traballo continuo e innovador, co lanzamento de iniciativas como Boísimo ou a recente canle de WhatsApp, para contar, en galego, a ciencia e a tecnoloxía que facemos en Galicia.
No CSIC atopamos sempre en Gciencia un medio interesado e sensible co noso labor
Nestes 10 anos Gciencia cubriu os principais fitos científico-técnicos e iniciativas do sistema galego de I+D+i, entre cuxos axentes figura o CSIC cos seus institutos, centros e unidades de investigación na comunidade galega: Delegación Institucional, Misión Biolóxica de Galicia, Instituto de Estudos Galegos Padre Sarmiento (mixto coa Xunta), Instituto de Investigacións Mariñas, Instituto de Ciencias do Patrimonio, Centros Oceanográficos de Vigo e A Coruña, Instituto Español de Oceanografía, sede Atlántica da Unidade de Tecnoloxía Mariña e Centro de Supercomputación de Galicia.
No CSIC atopamos sempre en Gciencia un medio interesado e sensible co noso labor, a un medio aberto a novas liñas de actuación e a un medio comprometido con facer comunicación científica de calidade sobre o noso traballo. Por todo iso, parabéns e esperamos seguir mantendo unha estreita colaboración durante as próximas décadas.
