“Escoitas? Se o son é baixo, precisas amplificalo. Se tes unha cantidade moi pequena de ADN, por exemplo, nunha molécula sinxela, tes que amplialo, para secuencialo e estudalo”. Así explica Margarita Salas a súa invención máis importante, a caracterización do ADN polimerasa do fago Φ29, un achado con enormes aplicacións na biotecnoloxía e a medicina, que marcou un antes e despois no estudo da xenómica .
É unha das últimas aparicións públicas da prestixiosa científica, falecida este xoves. O vídeo, realizado pola Oficina Europea de Patentes (EPO), recolle un dos principais fitos dos achados de Salas: a patente do método da ADN polimerasa phi29 reportou máis do 50% dos dereitos de autor que ingresou o CSIC. Por este motivo, a EPO outorgoulle este mes de xuño o premio Inventora do Ano 2019, que recolleu en Viena.
