O reitor, Julio Abalde, presidiu esta mañá no Paraninfo da Reitoría o acto académico de investidura como doutores Honoris Causa dos profesores David Lawrence Uzzell e Enrique Orts Berenguer, apadriñados por Ricardo García Mira e Carlos Martínez-Buján Pérez, respectivamente.
David Uzzell, catedrático de Psicoloxía na Universidade de Surrey, está vinculado desde hai anos á Facultade de Ciencias da Educación en temas de psicoloxía ambiental.
Enrique Orts Berenguer, catedrático emérito de Dereito Penal na Universidade de Valencia, foi o primeiro decano da Facultade de Dereito da Universidade da Coruña, logo da segregación da Universidade de Santiago de Compostela.
O reitor Abalde loubou o traballo de Uzzel especialmente na súa análise das consecuencias para a psicoloxía da actual crise climática, “un problema colectivo que esixe unha solución colectiva”. E salientou a labor de Orts como xurista, tanto na súa faceta como profesor como a de penalista na realidade democrática xurdida tras da Constitución de 1978.
David Uzzell é psicólogo social e xeógrafo, catedrático de Psicoloxía na Universidade de Surrey, Reino Unido. Lidera un Grupo de Investigación en Psicoloxía Ambiental, actualmente é Profesor Visitante da Universidade de Umeå (Suecia).
A súa investigación inicial desenvolveuse na participación pública no proceso de planificación urbanística. Un segundo núcleo de contribucións teóricas tense centrado na conciencia das persoas sobre as actitudes e comportamentos en resposta á situación e entornos de risco e na vida en condicións de incertidume. As áreas investigadas incluíron a delincuencia en zonas urbanas e a configuración do transporte, o risco e a seguridade nos entornos recreativos, a percepción e a preocupación polo risco en contextos mineiros e enerxéticos. Un terceiro núcleo examinou o papel da identidade social e de lugar como unha variable que afecta ao fomento da acción ambiental.
No período 2002-2005, e tras o afundimento do petroleiro Prestige colaborou coa investigación sobre o desastre do Prestige, coordinada polo profesor Ricardo García Mira. No período 2006-2007 colaborou tamén con este grupo de investigación na Comisión creada para analizar o impacto social dos incendios de 1996 en Galicia.
Enrique Orts Berenguer é na actualidade catedrático emérito de Dereito Penal da Facultade de Dereito da Universidade de Valencia. Foi o primeiro decano da Facultade de Dereito da Universidade da Coruña, logo da segregación da Universidade de Santiago de Compostela.
Toda a súa vida académica estivo dedicada en exclusiva á docencia e á investigación, en Dereito Penal pero tamén na disciplina de Criminoloxía.A súa actividade docente tivo unha parántese de dous anos ao ocupar a praza de Letrado do Tribunal Constitucional.
