Únete á nosa canle de Whatsapp
O SARS-CoV-2 pasará á historia como a minúscula partícula, dunha milésima parte do ancho dun cabelo humano, capaz de cambiar o mundo. Saltando de persoa a persoa, desde que se rexistrou a primeira transmisión a humanos a finais de 2019 na provincia chinesa de Hubei, infectou a polo menos cinco millóns de seres humanos (todo apunta a que a cifra real multiplica varias veces este valor) e causou a morte dun mínimo de 320.000. Pero ata agora foi difícil velo tan en detalle: o estudio Visual Science difundiu a pasada semana o modelo en tres dimensións máis detallado do SARS-CoV-2.
O traballo, que contou co asesoramento de virólogos e inmunólogos de varios centros de investigación, achega a escala atómica algúns dos detalles máis salientables desta partícula. Coas últimas achegas no estudo dos coronavirus, e co uso de técnicas de bioinformática moi precisas, as imaxes fan un percorrido no que se poden ver as súas particulares espículas (razón pola que esta familia de patóxenos recibe o alcume de coronavirus), o código xenético en forma de ARN que alberga no seu interior, así como a interacción cos anticorpos que o organismo xera para combatelo.
O modelo do novo coronavirus sucede a outros traballos realizados polo mesmo estudo sobre o VIH, a gripe A, o ébola ou o zika. Para destacar as diferentes partes da partícula, a animación amósaa en distintas cores que non se corresponden coa realidade.
We finished our work on a detailed and scientifically accurate model of the SARS-CoV-2 model, have a look: https://t.co/05dGq0jFYJ pic.twitter.com/MsQuRypzhD
— Visual Science (@visualscience) May 14, 2020
