Únete á nosa canle de Whatsapp
Desde hai máis de 20 anos, o veterinario e naturalista Francisco Javier Lema percorre os montes da Costa da Morte e zonas próximas da provincia da Coruña á procura de imaxe do Canis lupus, o lobo, unha especie perseguida e que atopa numerosas dificultades para vivir en liberdade en Galicia.
E acaba de publicar na canle “De naturae“, en Youtube, unha peza de case 13 minutos na que compila as imaxes tomadas durante os seus últimos anos de avistamentos de lobo. Alén dunha profunda descrición do ciclo vital e a ecoloxía da especie, Lema tamén introduce outras especies de aves e flores que agroman durante esta época nos montes da Costa da Morte.
“A poboación do lobo estase mantendo, polo menos na zona na que me movo. Pero é difícil dicilo porque non hai estudos que poidan determinar con exactitude o tamaño das poboacións”, explica Lema Fuentes. É un equilibrio complicado, segundo recoñece, debido aos problemas cos ataques ao gando que provocan actuacións furtivas nos gandeiros e cazadores da zona.
No vídeo, o documental describe comportamentos como a demarcación do territorio, o crecemento dos lobetos, a cópula, que adoitan realizar na primavera, ou os movementos migratorios das manadas.
