Martes 19 Marzo 2024

Down Galicia e USC acordan impulsar proxectos de I+D e formación

O presidente de Down Galicia, Delmiro Prieto, e o reitor da Universidade de Santiago de Compostela, Antonio López, asinaron este mércores no edificio do Reitorado un convenio de colaboración que busca estreitar as súas relacións, xuntar esforzos e establecer normas amplas de actuación que canalicen e incrementen os seus contactos e colaboracións.

O obxectivo do convenio é establecer un marco de colaboración entre a USC, en especial coa Facultade de Medicina e Odontoloxía, pero sen excluír outros centros, departamentos e servizos da Universidade, e Down Galicia en actividades culturais, científicas, pedagóxicas, de investigación e outras que sexan de interese para as dúas partes.

Publicidade

As colaboracións traduciranse en proxectos e programas de I+D; a través da cooperación en programas de formación de persoal investigador e técnico; do asesoramento mutuo en cuestións relacionadas coa actividade das dúas entidades; e da organización e execución de actividades comúns relacionadas coa promoción social da investigación, a docencia e o desenvolvemento tecnolóxico, entre outras.

Unha colaboración que estende a xa existente entre esta entidade e USC, no marco dun importante estudo sobre saúde oral. A investigación, dirixida polo catedrático de Estomatoloxía Pedro Diz, está centrada en evitar a aparición e/ou o avance da carie e da piorrea nas persoas coa síndrome de Down e na poboación en xeral. O traballo afonda na posibilidade de que as persoas coa síndrome de Down teñen unha bacteria na boca que axuda a previr a caries, polo que, de confirmarse esta hipótese, permitiría establecer as bases dun tratamento do que se beneficiaría toda a poboación.

Down Galicia ten como finalidade xeral coordinar, apoiar e impulsar o labor de contribución das entidades membro cara a mellora da calidade de vida de cada persoa con esta doenza e con discapacidade intelectual e das súas familias, a través da plena inclusión social e da utilización dos recursos ordinarios da comunidade. Na actualidade confórmana as entidades de Down de Vigo, A Coruña, Lugo e Ourense, Pontevedra ‘Xuntos’, Teima de Ferrol e Fundación Down Compostela.

No acto de sinatura estiveron presentes a vicerreitora de Comunicación, Cultura e Servizos, Mar Lorenzo Moledo; o decano da Facultade de Medicina e Odontoloxía, Julián Álvarez Escudero; o vicedecano deste centro, Jacobo Limeres; e o catedrático de Estomatoloxía Pedro Diz Dios.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un equipo galego sinala os lípidos en sangue como potenciais biomarcadores de covid persistente

Investigadores do CiQUS ofrece unha nova perspectiva sobre a natureza desta enfermidade e abre a porta a diagnósticos e tratamentos máis específicos

Un equipo da USC identifica os clons de ‘E. coli’ causantes de infeccións urinarias graves

O estudo busca axilizar a vixilancia etiolóxica hospitalaria e comunitaria destas doenzas, ademais de facilitar o deseño de vacinas

A disputa literaria entre dous escritores do século XII plasmada no Códice Calixtino

O investigador José María Anguita Jaén relaciona a vida destes autores coetáneos que defenderon intereses dispares nas guerras dinásticas inglesas

O estereotipo das mulleres rurais: "Vémolas dende un paternalismo feroz"

A investigadora da USC Ana Cabana publica un libro onde analiza a política agraria do último século dende a perspectiva de xenéro