Únete á nosa canle de Whatsapp
A ciencia mariña de vangarda que desenvolven os grupos do Centro de Investigación Mariña (CIM) da Universidade de Vigo traspasou esta fin de semana as portas dos laboratorios. O seu obxectivo era proxectarse á sociedade e dar a coñecer os diferentes eidos nos que traballan. Así é que 150 persoas participaron nas actividades deseñadas dentro do programa Divulgando Ciencia Singular, unha proposta na que participan os cinco centros de investigación do Campus de Vigo entre os meses de outubro e novembro. O CIM foi o máis madrugador e deseñou unha serie de actividades tanto no campus, como na Ecimat e na propia ría de Vigo.
Visitas guiadas
Así, o venres 22 celebráronse unha serie de visitas guiadas no campus, en concreto ás instalacións dos grupos de investigación do CIM no edificio de Ciencias Experimentais e no edificio Olimpia Valencia. O sábado 23 as actividades trasladáronse á Estación de Ciencias Mariñas de Toralla e á propia ría, xa que as persoas inscritas saíron do peirao de A Laxe nun barco que os deixou na Ecimat, a principal infraestrutura de investigación do CIM. Durante tres horas puideron gozar da combinación de diferentes experiencias, dende o traxecto no barco-aula no que aprenderon cuestións interesantes sobre a ría de Vigo e descubriron o funcionamento dun robot subacuático ata a visita aos laboratorios, salas de cultivos, etc.
Dende a organización valoran moi positivamente a resposta da cidadanía a este convite para coñecer a investigación mariña que se desenvolve na UVigo e, de feito, as prazas ofertadas, “enchéronse en apenas dous días, o que dá unha idea do interese da xente por este tipo de propostas divulgativas”. Agora queda por diante unha nova cita, o venres 29, pero desta volta no Campus de Ourense, para coñecer o grupo de investigación EPhysLab, pertencente ao CIM. A visita terá lugar entre as 12.00 e as 12.40 horas e a inscrición está aberta.
Novas citas en novembro
Mais o programa Divulgando Ciencia Singular non remata. Continúará este xoves 28 coa xornada de portas abertas do Cintecx, que recibirá a partir das 16.00 horas ao alumnado do Bacharelato STEM do colexio Compañía de María de Vigo, para o que deseñaron un programa de actividades que comprende tres obradoiros sobre combustión, intelixencia artificial e desenvolvemento sostible e biotecnoloxía.
Nas próximas semanas uniranse a estas xornadas divulgativas o resto dos centros de I+D do Campus de Vigo. Así, o Centro de Investigación Biomédica deseñou o ciclo Ciencia con C de Cinbio, que consistirá na realización de diferentes actividades que se artellan arredor de tres bloques temáticos: Cinbio na escola (2 de novembro), Cinbio na rúa (4 e 9 en Ourense e Vigo, respectivamente) e Coñece o Cinbio (11, 13 e 19 de novembro).
Pola súa banda, o Centro de Investigación e Tecnoloxías de Telecomunicación, atlanTTic, abrirá as súas portas ao publico xeral a finais do mes de novembro con visitas guiadas ás súas instalacións, obradoiros e demostracións prácticas. Finalmente, o centro interuniversitario de investigación Economics and Business Administration for Society (Ecobas) tamén desenvolveu varias actividades de proxección, que se completaron onte coa presentación dos resultados do proxecto SAVES.
