A ciencia e coñecemento sairán dos laboratorios e as aulas o vindeiro venres, 24 de setembro, para trasladaranse a rúas, museos, parques e bares para celebrar a Noite galega das persoas investigadoras, a G-Night. Esta iniciativa encherá as cidades de Vigo, Ourense, Pontevedra, Santiago de Compostela, A Coruña, Ferrol e Lugo de actividades de divulgación científica.
As vicerreitoras de Comunicación e Relacións Institucionais da UVigo, Mónica Valderrama, e de Investigación, Belén Rubio, foron as encargadas de presentar a programación deste evento de divulgación científica que se celebra de xeito simultáneo en cidades de toda Europa o último venres de setembro e que, no caso de Galicia, está coordinado pola Universidade de Vigo. O obxectivo é, como explicaba Rubio, “achegar a figura da persoa investigadora e a investigación e os seus beneficios á sociedade en xeral, prestando especial atención ás vocacións científicas”. Nesta edición, a décima, e baixo o lema Conciencias creativas, “o leitmotiv será a creatividade e a súa relación co coñecemento científico, a ruptura de estereotipos e a interdisciplinariedade”.
As sete cidades galegas acollerán actividades de divulgación científica o vindeiro venres 24
As actividades desenvolveranse nas sete cidades galegas e en contextos informais, levando a ciencia “ás rúas, prazas, museos, praias e bares nun ambiente festivo” en formatos diversos como charlas, conferencias, obradoiros manipulativos, rutas científicas, teatro, música, experiencias, experimentos, etcétera. E pensadas para todo tipo de públicos: infantil, xuvenil, familiar, público ou adulto, independentemente da súa formación e coñecementos.
A Universidade de Vigo coordina este evento en Galicia e conta cun financiamento de preto de 154.000 euros, procedentes do programa marco H2020, a través das accións Marie Sklodowska-Curie Actions. Xunto coa institución viguesa participan na organización das actividades as universidade de Santiago e A Coruña, o Cesga, a Unidade de Cultura Científica da Delegación do CSIC en Galicia e Instituto de Investigacións Mariñas, o Centro Oceanográfico de Vigo, Gradiant, Itmati, Inibic e Sebbm, co patrocinio da Xunta de Galicia.
A importancia de comunicar a ciencia
O reitor da Universidade, Manuel Reigosa, felicitou ás dúas vicerreitoría implicadas neste proxecto e á Unidade de Cultura Científica polo deseño do programa e subliñou a importancia deste tipo de eventos xa que permiten “comunicar o que se fai nos laboratorios e centros de investigación e, ao tempo, render contas ante a sociedade, xa que somos institucións públicas que se financian cos impostos”. O reitor destacou que a pandemia fixo que a cidadanía fose consciente da importancia que ten a ciencia “pero é bastante doado que se nos esqueza”, polo que recalcou a idoneidade deste tipo de eventos para axudar a poñer en valor o traballo do persoal investigador nos cinco eidos do coñecemento: ciencias da saúde, ciencias, tecnoloxía, ámbito xurídico-social e tamén o humanístico, “que moitas veces adoita esquecerse”.
Regreso á presencialidade
Como explicaba a vicerreitora de Investigación, no ano 2019 financiáronse 55 proxectos que levaron a Noite Europea das Persoas Investigadoras a 433 cidades de 27 países, coa participación de 1,6 millóns de persoas e 36.000 investigadores involucrados. Tras unha edición virtual en 2020, neste 2021 regresarán as actividades presenciais. “A nosa máxima ilusión é chegar ao maior número de persoas posible”, apuntaba a vicerreitora de Comunicación e e Relacións Institucionais, Mónica Valderrama, que foi a encargada de detallar a programación para as cidades de Vigo, Ourense e Pontevedra, organizadas xunto cos parceiros locais como o IEO ou Gradiant.
A programación da G-Night en Vigo comezará con actividades en centros escolares, pero a parte central do evento desenvolverase pola tarde-noite en diferentes localizacións. No que se refire a Vigo, na praza do Berbés instalarase unha feira científica que se poderá visitar de 18 a 21 horas con 12 postos sobre temáticas variadas, como ciencia mariña, enxeñaría, xenética, termografía ou o monopraza de UVigo Motorsport. Ademais, no edificio Redeiras, a sede institucional da UVigo na cidade, instalarase unha exposición sobre investigación e divulgación científica en galego e ás 19.00 h comezará un ciclo de relatorios sobre temas como quecemento global, lingüística ou minerais. Paralelamente tamén haberá unha mostra de graffiti en vivo nesa mesma contorna.
No Marco haberá un Escape room e na Biblioteca Central do campus, obradorios e exposicións arredor da observación astronómica
Outras das localizacións da G-Night en Vigo serán o Museo Marco, no que dende as 17.30 haberá un Escape Room e charlas e obradoiros organizados por CEMMA e o Instituto de Investigacións Mariñas, a proxección dunha parte do documental A muller Romana en Gallaecia e o espectáculo Luthieria electrónica e experimental.
Tamén haberá actividades no campus, concretamente na Biblioteca Central, onde se desenvolverán obradoiros e exposicións arredor da observación astronómica, que culminarán coa actuación do grupo Tinta. Outra das patas desta iniciativa é a Ciencia no bar, unha proposta que levará a divulgación científica a diversos locais de hostalaría, en concreto no caso de Vigo, no Vitruvia Café, con tres sesións sobre street art, alimentación ou o dieselgate. Finalmente, a programación complétase con paseos científicos pola ría que sairán do Porto de Vigo.
No que atinxe a Ourense, no campus a partir das 18.00 h haberá un paseo científico centrado no ecosistema Campus da Auga e en El Pueblo Café Bar dúas sesións de Ciencia no bar. En Pontevedra terán lugar tamén actividades matinais en centros escolares e, pola tarde, Ciencia no bar en La Gramola e un paseo científico no Parque das Palmeiras.
O programa completo de actividades de cada cidade pode consultarse na web do proxecto. Por mor das restricións debidas á Covid-19, para participar é preciso inscribirse previamente en todos os eventos agás na feira científica do Berbés e na mostra de graffiti.
