A covid-19 posúe unha variabilidade de presentación entre os individuos, algúns aos que afecta de maneira moi grave e outros que teñen formas asintomáticas. Unha porcentaxe importante desas diferenzas son xenéticas e estúdanse con análises masivas de asociación que se denominan GWAS. Neles analízanse en cada individuo preto dun millón de datos xenéticos (SNPs) e compáranse os dous grupos (os que teñen COVID severo e os que non).
A revista Nature acaba de publicar un estudo de enfermos críticos de tres consorcios: GenOMICC UK (11.440 casos), que coordina o traballo, ISARIC4C (676 casos) and SCOURGE (5.934 casos), este último coordinado por Anxo Carracedo do CiMUS da USC e Instituto de Investigación Sanitaria (IDIS) e Pablo Lapunzina do Hospital La Paz, desde o Cento de Investigación en Rede (CIBER) do ISCIII. No estudo participaron máis de 30 hospitais e centros de investigación de España e foi realizado no Centro Nacional de Xenotipado (Fundación Pública Galega de Medicina Xenómica, IDIS). As investigadoras Raquel Cruz (CIBERER e CIMUS-USC) e Silvia Diz (CiMUS da USC) realizaron a parte estatística e de interpretación.
“O estudo mostrou 49 rexións xenómicas asociadas nas que se estudaron as posibilidades de novas terapias con novos modelos de análises e atopáronse dianas terapéuticas de moito interese sobre as que se poderían usar fármacos de reposicionamento nalgúns casos e que inclúen roteiros de inflamación (JAK1), activación monocito-macrófago (PDE4A), inmunometabolismo (SLC2A5, AK5) e factores do hóspede necesarios para a entrada dos virus e a súa replicación (TMPRSS2, RAB2A)”, segundo explica Anxo Carracedo, un dos coordinadores do traballo.
A investigación contou co apoio da Fundación Amancio Ortega Gaona, Banco de Santander S.A. e Instituto de Saúde Carlos III (COV20/00622) e o Fondo Europeo de Desenvolvemento Rexional. O equipo científico responsable quere “agradecer especialmente a todos os pacientes, Banco Nacional de ADN, Biobanco do Sistema de Saúde de Aragón, Biobanc Fundació Institut d’Investigació Sanitària Illes Balears, Biobanco do Complexo Hospitalario Universitario de Santiago, Biobanco Vasco, a súa colaboración e material achegado”.
