A rexeneración da cartilaxe articular é un gran desafío científico. As estratexias dispoñibles hoxe en día tan só permiten a obtención dun tecido fibroso que carece das calidades da cartilaxe ordinaria da articulación. A investigadora Ana Rey da Universidade da Coruña (UDC) está a buscar alternativas para a reparación do tecido cartilaxinoso. A súa proposta recibirá preto de 200.000 euros do Ministerio de Ciencia tras ser seleccionada pola Axencia Estatal de Investigación para incentivar a consolidación investigadora.
Rey coordina o grupo Terapia Xénica e Celular (G-CEL) no Centro Interdisciplinar de Química e Bioloxía (CICA) da UDC. O seu obxectivo é deseñar novos sistemas virais baseados en niosomas —vehículos celulares estables e non tóxicos— que sirvan para transferir xenes e fármacos en células nai e así, buscar novas estratexias de reparación da cartilaxe articular.
A diferenza doutros tipos celulares, as células da cartilaxe presentan unha capacidade reparativa moi limitada debida á súa baixa actividade metábolica e á súa densa matriz extracelular, o que dificulta a súa rexeneración. A través deste estudo, Ana Rey pretende guiar a actividade destas células para que o tecido poida sandar.
Sete anos de estudo
Esta investigación iniciouse en 2018 desde a incorporación de Ana Rey ao centro e a creación do seu grupo G-CEL. Para ela, estes fondos significan “un paso máis alá á hora de incorporar outros compoñentes que nos permitan incrementar a eficiencia”, pero tamén “un avance para a consolidación da carreira investigadora”, engade. A súa bolsa Ramón y Cajal terminará o próximo outubro, polo que a resolución desta convocatoria permitirá a continuación do proxecto nos vindeiros anos.
Durante o período de financiamento, o estudo poderá avanzar no deseño de novos sistemas non virais de transfección, aumentar a súa eficiencia e utilizar estratexias seguras, supoñendo un avance clínico para o paciente, así como un progreso tamén a nivel tecnolóxico.
Colaboración con BioNanoChem
Como grupo pertencente a un centro de investigación interdisciplinar, o proxecto liderado por Ana Rey tamén contará con outro investigador Ramón y Cajal, Roberto J. Brea, do grupo BioNanoChem.
A súa experiencia en química de lípidos para aplicacións biomédicas proporcionará un novo enfoque á hora da modificación da composición dos niosomas, permitindo ao grupo G-CEL probar estas variacións nos cultivos celulares.
No curso deste estudo, tamén se aplicarán outras disciplinas como a microfluídica, unha tecnoloxía que move pequenas cantidades de líquidos a través de canais estreitos, co obxectivo de obter nanosistemas máis homoxéneos. Estes parámetros son importantes para utilizalos como vehículos de transfección.
