O profesor do Departamento de Ciencias da Navegación e Enxeñaría Mariña da Universidade da Coruña (UDC), José Antonio Orosa García, e Ander Ruiz Zardoya, doutorado pola mesma institución académica, son os autores da optimización do deseño dun motor mariño de combustión interna de gas natural licuado para queimar combustibles alternativos. O desenvolvemento desta nova metodoloxía foi publicado nun artigo en xuño de 2023 xunto cos expertos Iñaki Loroño Lucena, profesor da Universidade do País Vasco (UPV); e Íñigo Oregui Bengoetxea e Ángel López Martínez, investigadores da empresa Siemens.
As políticas sobre emisións mariñas son cada vez máis esixentes. Polo tanto, as tecnoloxías de propulsión de buques e xeración de enerxía deben adaptarse aos escenarios actuais. O Gas Natural Licuado (GNL) xa se considera un combustible de transición e están a xurdir novas alternativas.
A publicación amosa parte dos resultados obtidos ao longo da tese con mención industrial de Ander Ruiz Zardoya e dirixida por Orosa e Loroño, dentro das actividades de I+D da casa Siemens e o programa de doutoramento en enerxía e propulsión da UDC.
O obxectivo do estudo
Este estudo procura desenvolver unha metodoloxía para optimizar e adaptar un motor mariño de combustión interna de GNL para queimar combustibles mariños alternativos. O presente estudo baseouse en biogás licuado (LBG), pero a metodoloxía podería replicarse con outros combustibles.
Durante a investigación realizáronse un total de seis probas, con tres deseños de precámara e tres deseños de buxías. Cada proba levouse a cabo nun motor monocilíndrico con dous tipos de combustible con alto contido de metano. Os experimentos demostraron que modificando a precámara e a buxía, pódense lograr melloras na eficiencia térmica do 1,9%. Esas melloras permitiron que o motor LBG sufrise só unha redución de eficiencia térmica do 4,3%, a diferenza do seu homólogo de GNL. Ao aplicar a metodoloxía proposta, poderíase mellorar a eficiencia térmica dos motores de combustión interna de gas dispoñibles comercialmente.
Este traballo foi continuado con traballos nas revistas do máis alto impacto no mundo da enerxética e da industria naval, como Energy (Q1), e precedido por outros traballos en colaboración coa Universidade das Palmas de Gran Canaria.
Premio internacional
A raíz da súa investigación, José Antonio Orosa García e Ander Ruiz acaban de ser galardoados pola revista especializada do ámbito mariño Journal of Marine Science and Engineering (JMSE) (Q1) polo seu artigo.
Estes investigadores da UDC recibiron o segundo premio JMSE 2023 Best Paper Award, xunto aos seus colaboradores, consistente en 500 francos suízos e a publicación dun artigo gratuíto na revista.
Referencia: Methodological Design Optimization of a Marine LNG Internal Combustion Gas Engine to Burn Alternative Fuels (Publicado en Journal of Marine Science and Engineering)
