Despois de anos de reformas, con centos de alumnos e profesores espallados por varias facultades, a USC anunciou a pasada semana que tiña intención de demoler un dos edificios emblemáticos do Campus Vida, que acolle o aulario e laboratorios da Facultade de Farmacia. Falouse, no marco deste anuncio, dun problema de contaminación da que se di que mesmo xerou problemas de saúde puntuais nalgunhas persoas, mais o descoñecemento sobre a orixe do asunto xerou preocupación en parte da comunidade universitaria. E mesmo xerou protestas entre o alumnado, coincidindo co anuncio da demolición que ía retrasar aínda máis a volta á súa facultade despois de tres cursos de obras: hai estudantes que apenas pisaron a que debería ser a súa ‘casa’ universitaria.
Unha fuga nun depósito
O problema coñeciuse hai máis de 10 anos, a finais de 2007. Explican fontes da USC que se produciu unha fuga nun depósito de fuel, que despois foi de gasóleo, para consumo propio do centro. A fuga filtrouse ao solo, e contaminou unha zona situada baixo a facultade. Ao detectar a contaminación da zona, realizáronse as primeiras tarefas de limpeza, intentando extraer o combustible que había no subsolo. Mais o labor non foi suficiente, e o problema persistiu.
Aclaran desde a USC que este feito non xerou ningún tipo de problema estrutural: o principal inconveniente son os cheiros que desprende, e que pode xerar malestar e mesmo problemas puntuais de saúde nas persoas usuarias do edificio. Porén, a dificultade de acometer a limpeza co edificio enriba, segundo recoñecen desde a institución, convérteo nun procedemento arriscado e custoso.
Con este panorama, a USC manifestou a semana pasada a intención de esgotar todas as posibilidades de limpeza antes de demoler, comezando por “un método menos agresivo e custoso que os probados ata agora e cuxa viabilidade se coñecería en tres meses”. Trátase de inxectar oxidantes para acadar a descontaminación química do solo, no canto da retirada física, a través da degradación do combustible.
Non en tanto, para axilizar prazos, e á espera da posible efectividade desta medida, xa se buscan as alternativas para reabrir canto antes a Facultade de Farmacia. A institución anunciou que ía solicitar un proxecto de demolición para coñecer o custo das obras. Un custo que, segundo sostén o equipo de goberno, “se prevé amortizar en sete anos, tendo en conta o aforro de 250.000 euros anuais para a Universidade que supoñen 5.500 metros cadrados menos de mantemento”, e dentro da liña de racionalización de espazos pola que avoga o actual equipo de goberno da institución.
