Carmen García Mateo gaña ás eleccións á reitoría da UVigo e fai historia ao converterse na primeira muller á fronte da institución académica. A candidata de Nós Universidade logrou a vitoria na segunda volta cun 56% dos votos ponderados fronte ao equipo de H2040 encabezado por Belén Rubio. García Mateo obtivo máis apoio entre o persoal investigador e docente con vinculación permanente, o persoal de xestión e servizos e o estudantado. O único no que gañou Rubio, actual vicerreitora de Investigación, foi entre o restante persoal do corpo de investigación e docencia.
A nova reitora baseou a súa campaña no cambio respecto ao actual goberno. Un dos aspectos nos que incidiu durante a presentación da súa candidatura foi o de atallar a “perda de influencia e peso” que a UVigo tivo “sobre todo neste último mandato”. Concibe unha universidade “influínte, autónoma, con voz propia no debate científico, económico e cultural de Galicia”.
A súa investigación
García Mateo é catedrática da área de Teoría do Sinal e Comunicacións na UVigo, a universidade á que leva vinculada dende 1987. É profesora na Escola de Enxeñaría de Telecomunicación e lidera o equipo en Tecnoloxías Multimedia (GTM) de atlanTTic, o Centro de Investigación en Tecnoloxías de Telecomunicación. As súas liñas de estudo céntranse na tecnoloxía da fala en galego e castelán, na segmentación de audio, no recoñecemento biométrico e na detección por voz de enfermidades neurodexenerativas. Dentro do seu perfil como investigadora, ten máis de 150 publicacións en revistas e congresos internacionais.
Entre os seus proxectos máis destacados como científica están Cotovía, o primeiro conversor texto-voz bilingüe en galego e castelán. Tamén VOGATEL e FalAI, que consistiron na recollida de voz en galego para o adestramento de sistemas conversacionais. Outra inicitiva destacada é COPERIA, para a detección da covid persistente mediante análise acústica de tose e voz. E finalmente VISIA, unha sentinela de risco de suicidio en adolescentes baseada en intelixencia artificial.
Do Wonenburger aos cargos de xestión
En 2014, García Mateo recibiu o Premio María Josefa Wonenburger; un recoñecemento que entrega a Xunta de Galicia para poñer en valor a traxectoria de mulleres científicas galegas. Tamén participa regularmente na promoción e divulgación para reforzar a presenza feminina nos eidos STEM. Así mesmo, foi membro do plenario do Consello da Cultura Galega dende 2016 a 2024, e coordinadora da sección de Lingua, Literatura e Comunicación do 2018 ao 2024.
Dende o punto de vista da xestión universitaria, exerceu como vicerreitora de Titulacións e Converxencia Europea da UVigo entre 2006 e 2010 con responsabilidade na adaptación da oferta académica da institución ao Espazo Europeo de Educación Superior.
