Venres 12 Xullo 2024

Anunciación Casado, a ‘Pasionaria de Viana’: comezan os traballos de exhumación

As accións enmárcanse no Plan Cuadrienal de Memoria Democrática en Galicia 2023 liderado por un equipo interdisciplinario da USC

Os traballos de exhumación da fosa común de Castro-Pixeiros, en Viana do Bolo, deron comezo este luns 23 no marco do Plan Cuadrienal de Memoria Democrática en Galicia 2023. O equipo encargado dos traballos atópase integrado por especialistas en historiografía, antropoloxía forense, arqueoloxía e xenética que pescudan sobre o pasado da violencia franquista en Galicia. A persoa que tentan localizar na parroquia de Pixeiros é Anunciación Casado, que contaba con 38 anos cando a asasinaron, o 21 de agosto de 1936, na curva das Revendeitas, na estrada que vai da Gudiña a Viana. Foi inscrita no rexistro de defuncións do xulgado de Viana do Bolo, o 30 de agosto dese mesmo ano, en virtude dun oficio do xuíz de instrución do Partido. A pesar de que a súa morte foi rexistrada a consecuencia de “fractura e destrución da masa cerebral”, en realidade, a propia natureza do crime e das feridas que sufriu constitúen un “paseo”, tal e como explican dende o equipo de investigación.

Por parte da USC, a través do grupo de investigación de Historia Agraria e Política do Mundo Rural (Histagra), integran o equipo o catedrático de Historia Contemporánea Lourenzo Fernández Prieto e o profesor Antonio Míguez Macho, os cales coordinan un equipo formado por arqueólogos dirixidos polo profesor da USC José Carlos Sánchez Pardo, o antropólogo forense do Instituto de Medicina Legal de Galicia (IMELGA) Fernando Serrulla Rech e o equipo de xenética do Instituto de Ciencias Forenses ‘Luis Concheiro’. En futuras datas, o equipo intervirá tamén nas fosas do cemiterio de San Salvador de Trasanquelos (Oza-Cesuras) e na de Santa María do Val (Narón).

Publicidade

Ademais das tarefas de localización, exhumación e identificación, o Plan conta con outras dúas liñas estratéxicas relativas á divulgación dos traballos efectuados e dos seus resultados, xunto coa dignificación dos puntos de enterramento e promoción dos lugares de memoria. Entre 2021 e 2022 realizáronse os traballos de investigación e exhumación das fosas de Vilagarcía de Arousa e Crecente (2021), Celanova, Lousame e A Capela (2022), alén de comezar as investigacións da fosa de Serantes (Ferrol) e a actualización do mapa de fosas “onde na actualidade contamos con 91 localizadas”, explican dende Histagra. En doce delas, os restos foron trasladados a Cuelgamuros en diferentes anos. Para a presente anualidade, contémplase o recoñecemento do espazo da fosa común do cemiterio de Celanova, a de Vilagarcía de Arousa, Crecente e Lousame.

Axuda da sociedade civil

“Seguimos actualizando o mapa de fosas de Galicia, para realizar nos vindeiros anos a maior cantidade de exhumacións dos enterramentos de asasinados/as pola violencia franquista”, explican dende Histagra. “O contacto cos axentes sociais é imprescindible, por iso facemos un chamamento a todas as persoas que desexen exhumar ou investigar fosas relacionadas coa violencia franquista, así como achegar datos”, engaden. “De novo, a axuda e a presenza da sociedade civil de Galicia, a través das asociacións de memoria democrática, investigadores locais e familiares de asasinados/as, convértese nun piar fundamental da investigación”, afirman. As persoas interesadas poden contactar co equipo investigador a través de histagra@usc.es

Publicidade

En agosto de 2023 asinouse entre a USC e a Xunta de Galicia, a través da Vicepresidencia Primeira e Consellaría de Presidencia, Xustiza e Turismo, e a Consellaría de Cultura, Educación e Universidade, o convenio de colaboración para poñer en marcha a anualidade 2023 do Plan Cuadrienal de Memoria Democrática, seguindo o impulso da Secretaría de Estado de Memoria Democrática.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Buscan nun cemiterio de Narón unha das maiores fosas creadas polos golpistas en Galicia

O 26 de decembro de 1936 levouse a cabo unha das máis grandes execucións masivas das que hai constancia en terras galegas, na que foron asasinadas un total de 34 persoas

Arrinca a primeira exhumación de represaliados en Galicia ao abeiro da nova Lei de Memoria

Ademais desta intervención na Capela está previsto que este mércores 23 de novembro comecen as exhumacións en Celanova e Lousame

Descobren con éxito restos óseos na tumba dun potencial familiar de Colón

A Asociación Colón Galego atopa con éxito os restos de Xohán Mariño de Soutomaior na tumba ubicada na igrexa de San Martiño de Sobrán

Atopan restos óseos na necrópole de Poio onde buscan a orixe galega de Cristóbal Colón

Os arquéologos cren que os ósos poden ter máis de 200 ou 300 anos segundo as pezas de cerámica que apareceron na exhumación